VOV4.bahnar - Pơgê năr 29/12 tơ̆ Hà Nội, Thủ tướng Tĕh đak vang năm Hop akŏm trư̆k tuyên lơ̆m tĕh đak pơtôch tơdrong jang sơnăm 2021, tơlĕch tơdrong jang sơnăm 2022 kơ hơnĭh jang vei lăng Chŏh jang sa păng Atŏk tơ iung tơring tơrang, kơ yuơ Dơnŏ anĭh tơm vei lăng Chŏh jang sa păng Atŏk tơ iung tơring tơrang pơgơ̆r. Sơnăm 2021, hơnĭh jang vei lăng Chŏh jang sa păng Atŏk tơ iung tơring tơrang hơnơ̆ng tơlĕch jang kiơ̆ tơdrong jang lơ̆m khei ‘năr tơ jră mŭh măt hăm lơ tơdrong tơnap tap, tơdrong long; mă lei oei đei tŏk kơtang, jang keh đang “trong tơlĕch jang ting ring; mĭnh păh iung jang tang găn jơnei jĭ hơpŭh, adoi atŏk kơtang chŏh jang sa, tơgŭm ‘lơ̆ng hơ iă ăn tơdrong ‘mĕh vă pơm tơlĕch tĕch mơdro lơ̆m tĕh đak păng tơ̆ tĕh đak đe. Sơnăm 2021, kơ jă tŏk jơnei lơ̆m hơnĭh jang (VA) tŏk 2,85-2,9%, tĕch mơdro tơ̆ tĕh đak đe iŏk đei 48 ti 600 trĭu dolar. Lơ trong tơlĕch jang kơ hơnĭh au hlôi jang keh đang păng keh đang hlŏh nơ̆r tơchơ̆t. Sơnăm 2022, lơ̆m hơnĭh jang akŏm tơlĕch jang kiơ̆ kơtang hơmet ming ‘moi kiơ̆ trong tŏk kơ jă păng atŏk tơ iung kơ jăp. Pơma pơtôch hop akŏm, Thủ tướng Tĕh đak Phạm Minh Chính  athei hơnĭh jang kăl tơlĕch jang kiơ̆ ‘lơ̆ng hơ iă, tang găn kĕ jĭ hơbŭh Covid-19, vei lăng năng tông ‘lơ̆ng hơ iă jơhngơ̆m jăn kơ kon pơlei vang iung jang hơmet pơ ‘lơ̆ng tơnap tap ăn chŏh jang sa, pơm tơlĕch tĕch mơdro, tơgŭm djru jơnei ăn kon pơlei păng hơnĭh mơdro sa. Pơgĕnh lơ̆m rim tơdrong rơvơn vă pơtrŭt kơtang iung jang tơgum păng atŏk tơ iung mŭk drăm-tơpôl, atŏk tơ iung hơnĭh jang chŏh jang sa lơ̆m khei ‘năr jang sa hle.

Tơblơ̆ nơ̆r: Amazưt