VOV4.Bahnar - Kơ sơ̆ 19/10, Thủ tướng Phạm Minh Chính tơ ƀâp bơ ngai tang măt rơ gei dơ̆ng tang ăn đe drŏ kăn ƀlep ƀât tơ băt 91 sơ năm năr pơ jing Khul drŏ kăn Việt Nam, Năr drŏ kăn Việt Nam 20/10.

Tơ̆ jơ tơ ƀâp, 46 ‘nu bơ ngai tang măt ‘nŏh jĭ đe Mĕ Việt Nam nuih mơng, đe drŏ kăn rơ gei lơ̆m khul đei hŏk jrŭ, bơ ngai pơ dro, đe ƀak si, bơ ngai jŏh hơ ri hơ xoang, công nhân, khul linh, bơ ngai jang tơ bôl, drŏ kăn đei tơ drong arih xa mơ mat tat, drŏ kăn vang bơ̆ jang tang găn jĭ hơ buh chă pơ đou dơ̆ng dôm tơ drong ‘lơ̆ng hơ iă lơ̆m sơ năm âu ki.

Pơ ma lơ̆m jơ tơ ƀâp, Thủ tướng Phạm Minh Chính akhan, Đảng, tĕh đak chih răk tơ drong plang jơ hngâm păng hơ năp jang tih tên đơ̆ng đe drŏ kăn Việt Nam lơ̆m rim chăl. Kon pơ lei băt bơ nê jơ hngâm đon plang tôch ‘lơ̆ng đơ̆ng đe Mĕ Việt Nam nuih mơng, đe mĕ hlôi rơ nĕh păng rong ‘me lơ jơ hnơr bơ ngai kơ tang nuih mơng kơ tĕh đak.

Dơ̆ng: Tơ blơ̆