VPOV4.Bahnarr - Pơgê brei, năr 15/3, tơ̆ hơnĭh bơ̆ jang Khŭl kơdră teh đak, Thủ tướng Nguyễn Xuân Phúc tơ ƀơ̆p kơdră tang măt Hơnĭh mong jên hŏk pơhrăm Vừ A Dính hăm kơdră tang măt ăn rim bơngai đei jơhngơ̆m đon ‘lơ̆ng vang iung jang hơdoi hăm Hơnih mong jên hŏk pơhrăm au lơ̆m lơ sơnăm au ki. Truh dang ei, Hơnih mong jên hlôi pôk ăn 90.000 tơnô̆ kon jên hŏk pơhrăm ăn hŏk tro, sinh viên găh 54 hơdrung ‘nhŏng oh, lơ̆m au đei hloi hŏk tro Việt Nam oei tơ̆ Campuchia, Lào, Thái Lan, Cu Ba.

Lơ̆m tơdrong jang kơ Hơnih mong jên 22 sơnăm au ki, sơnăm 2014 đei lăng jing hơyak gĭt kăl hlŏh hăm tơdrong đei pơjing đơ̆ng Khŭl “Kơ yuơ Hoàng Sa-Trường Sa ‘mêm kơ eng”, tơgop tơgoăt dôm jơhngơ̆m đon ‘lơ̆ng hơ iă vang lăng trŭh tơdrong jang vei lăng năng tông tơdrong pơm tơm kơ dih gĭt kăl kơ Tĕh đak. Iung pơma tơ̆ jơ tơ ƀơ̆p mŭh măt, Thủ tướng Nguyễn Xuân Phúc pơma hơdăh, lăng ba trŭh jơhnơr mơlô̆h păng vei lăng năng tông pơm tơm kơ dih tĕh đak ‘nŏh jing tơdrong gĭt kăl hlŏh kơ Đảng, tĕh đak păng kon pơlei bơ̆n. Lơ̆m khei ‘năr kơnh, Thủ tướng ‘mĕh vă Hơnĭh mong jên au hơnơ̆ng bơ̆ jang jơnei hlŏh dơ̆ng, lăng ba tơpôl kơ jăp hlŏh dơ̆ng, hơnơ̆ng jing dôm pơkao ‘lơ̆ng rŏ hơbŏ nhen lơ̆m pơgar pơkao ‘lơ̆ng hlŏh glŏh gloi kơ tĕh đak.

Tơblơ̆ nơ̆r: Amazưt