VOV4.Bahnar - Hơdrol kơ ‘nŏh, Thủ tướng Tĕh đak Phạm Minh Chính hlôi tơ ƀơ̆p rim ƀok thây pơgang, bơngai joăt jang pơgang Phalăng-Việt. Iung pơma tơ̆ tơ ƀơ̆p mŭh măt, Thủ tướng Tĕh đak Phạm Minh Chính tơbăt, ‘măng jĭ hơbŭh mă 4, hăm sơmach vir Delta, jĭ hơbŭh Covid-19 hlôi tơpŏh kơtang lơ̆m plei tĕh, lơ̆m au đei Việt Nam pơm kơnê̆ trŭh tôm tơdrong erĭh sa tơpôl. Mă lei hăm tơdrong hơdrin, tơgoăt mĭnh ƀơ̆r đon kơ jăp đơ̆ng lơ̆m tĕh đak păng tơdrong tơgŭm djru đơ̆ng bôl boăl apŭng plĕnh tĕh, lơ̆m au đei tĕh đak Phalăng, jĭ hơbŭh Covid-19 hlôi đei tang găn kĕ ƀiơ̆. Việt Nam jang kiơ̆ trong jang oei hơ iă lơ̆m chăl hle, tang găn jơnei jĭ hơbŭh; plôih ‘măng dar deh, atŏk tơ iung mŭk drăm-tơpôl. Thủ tướng hơpơi ‘mĕh vă rim ƀok thây pơgang, bơngai joăt jang pơgang Phalăng-Việt hơnơ̆ng tơgŭm Việt Nam ư̆h khan lăp lơ̆m tang găn hơlau, tơ jră tang găn jĭ hơbŭh Covid-19 hrei au mă lei tơgum Việt Nam lơ̆m đĭ đăng rim tơdrong, mă kăl lơ̆m tơdrong jang pơgang tang găn jĭ jăn, atŏk tơ iung hơnĭh jang pơm tơlĕch pơgang hơ yuơ hơnhăk đei tơdrong hơnŭk hoa, erĭh sa phĭ tơtŏ dơnŏ ‘lơ̆ng ăn kon pơlei.

Tơblơ̆ nơ̆r: Amazưt