VOV4.Bahnar - Kơ sơ̆ 2/11 kiơ̆ jơ tơ̆ tơ ring, lơ̆m hop akŏm mă 26 dôm pang vang jang kiơ̆ Tơ drong pơ kăp atŭm kơ Liên họp quốc găh tŏ ‘mi kial tơ plih (COP26) pơ gơ̆r tơ̆ tĕh đak Anh, Thủ tướng Phạm Minh Chính truh akŏm păng iung pơ ma lơ̆m tơ drong roi tơ băt Nơ̆r pơ kăp kăt tơ jur metan lơ̆m plei tĕh yoa Kơ dră tơm Mi Joe Biden păng Kơ dră Anih vei lăng châu Âu vang pơ gơ̆r.

Jơ bơ̆ jang lơ̆m Hop akŏm

Pơ ma tơ̆ âu, Thủ tướng Phạm Minh Chính tơ ƀôh đon bơ nê păng tơ chĕng ‘lơ̆ng tơ drong Anih pơ gơ̆r, Kơ dră tơm Mi păng Kơ dră Anih vei lăng châu Âu đei nơ̆r krao vang jang lơ̆m Nơ̆r pơ kăp kăt tơ jur metan. Tơ̆ tơ drong gĭt kăl âu, Thủ tướng Phạm Minh Chính pơ truh 2 nơ̆r tơ băt. Thủ tướng krao hơ vơn đĭ đăng bơ̆n athei tơ guăt 1 ƀơ̆r đon, drơ̆ng pôm nơ̆r, vang tang găn, pơm tơ jur ƀiơ̆ kơ chơ̆t metan đei tơ lĕch roi lơ. Thủ tướng pơ ma hơ dăh, ‘nâu jĭ tơ drong jơ̆p plei tĕh kơ na đei trong jang hơ doi jơ̆p plei tĕh; tơ drong ƀơm truh rim bơ ngai kơ na athei đei trong ăn đĭ đăng kon pơ lei vang jang.

Dơ̆ng: Tơ blơ̆