VOV4.Bahnar – Pơgơ̆r păng pơma dơnuh tơ̆ hop akŏm trư̆k tuyê̆n hăm Jơnŭm pơgơ̆r jang kơ teh đak păng 63 dêh char, plei tơm găh tang găn păng tơjră pơrang jĭ Covid-19 ăh kơsơ̆ năr 7/5 tơ̆ anih jang Khul kơpal teh đak, Thủ tướng Phạm Minh Chính ră hơdăh, ưh gơh lê̆ đei minh 'nu pơhơi pơhŏ lơ̆m tang găn păng tơjră pơrang jĭ mă pơm ăn tơpôl hrat jơhngơ̆m. Kiơ̆ đơ̆ng chă hơlen păng tơblang tơdrong tơm tơpoh jĭ, Jơnŭm pơgơ̆r jang kơ teh đak xơkơ̆t anih hơbuh pơrang jĭ Hà Nam tơrĕk truh bơngai jĭ kơsô̆ pơkăp 2899, anih hơbuh jĭ Yên Bái, Vĩnh Phúc đei tơrĕk truh khul bơngai juăt jang Ấn Độ păng Trung Quốc, anih hơbuh jĭ tơ̆ Hnam pơgang K tơpoh đơ̆ng anih hơbuh jĭ Hnam pơgang Nhiê̆t đơ̆i Trung ương. Mă lei anih hơbuh jĭ tơ̆ Hnam pơgang Nhiê̆t đơ̆i Trung ương păng minh ƀar bơngai ƀơm jĭ tơ̆ Đà Nẵng, Hải Dương ưh kơ băt tơpoh đơ̆ng yơ. Tơdrong mă noh ăn ƀôh, lơ̆m tơpôl hlôi đei xơmach jĭ. Đơ̆ng anih hơbuh jĭ Hnam pơgang K păng Hnam pơgang Nhiê̆t đơ̆i Trung ương, Ƀô̆ trưởng Anih tơm Y tê̆ Nguyễn Thanh Long xơkơ̆t, rim hnam pơgang athei pơih xă tơdrong hơlen dôm tơring mă ƀônh tơpoh jĭ nhen anih khăm hơlen jĭ, anih kâ̆p kư̆u, anih hơmet jĭ plei lĕn. Bơngai jĭ păng bơngai jang y tê̆ kăl đei iŏk hơlen pham păng xơkơ̆t khei năr khăm hơlen vă dăh hrôih ƀôh băt mưh đei hơbuh pơrang jĭ âu.

Pơma ăh hop akŏm, Thủ tướng Phạm Minh Chính pơkăl hơmet tơdrong pơhơi lơ̆m tang găn păng tơjră pơrang jĭ. Thủ tướng duh ră hơdăh, dôm tơring mưh hơbuh pơrang jĭ, nĕ hiơ̆r kơ đon mă athei hơdral vă xơkơ̆t tơnăp tôm tơdrong, dăh đei trong jang kăl hloh, ưh đei tơlĕch trong jang hloh tơdrong, pơgăn truh tơdrong xơđơ̆ng tơpôl păng hơtŏk mŭk drăm.

Lan chih păng pơre nơ̆r