VOV4.Bahnar - Pơgê năr 6/1, Thủ tướng Tĕh đak Phạm Minh Chính vang năm hop akŏm pơtôch bơ̆ jang Hơnĭh jang jên hu sơnăm 2021 păng tơlĕch tơdrong jang sơnăm 2022.

Iung pơma tơ̆ hop akŏm, Thủ tướng Tĕh đak Phạm Minh Chính athei, Hơnĭh jang jên hu kăl chĕp pơgơ̆r bơ̆ jang tơlĕch kon jên jang tĕh đak sơnăm 2022 mă kơ jăp, pơkom, jơnei, ‘moi kiơ̆ trong tơlĕch ăn đơ̆ng Kuô̆k hô̆i; sơđơ̆ng ăn iung jang rim tơdrong jang kăl, akŏm iung jang hơdrol tơdrong jang tang găn jĭ hơbŭh Covid-19, rim tơdrong jang kăl, gĭt kăl, atŏk kơtang tơlĕch kon jên jang tĕh đak tơmơ̆t jang, pơjing hơyak pran ăn hơmet pơ ‘lơ̆ng păng atŏk kơtang mŭk drăm. Thủ tướng lui akhan, hăm 76 sơnăm tơ iung pơjing păng atŏk tơ iung, tơdrong hơdrin, kơrŭn đĭ jơhngơ̆m đơ̆ng pơ đĭ Khŭl kơdră chĕp pơgơ̆r, kang ƀô̆ bơ̆ jang kơ Hơnĭh, Hơnĭh jang Jên hu hơnơ̆ng yak hlŏh tơnap tap, tơdrong long păng jang keh đang rim trong tơlĕch jang, tơdrong jang jên hu - hơnĭh mong jên bơ̆ jang tĕh đak, tơlĕch jang kiơ̆ ‘lơ̆ng Tơdrong jang hơmet pơ ‘lơ̆ng păng atŏk tơ iung mŭk drăm-tơpôl, tơgop lơ̆m jang keh đang trong pơ prŏ jang atŏk tơ iung muk drăm-tơpôl sơnăm 2022 kơ pơ đĭ lơ̆m tĕh đak, pơjing rơvơn vă tơlĕch jang kiơ̆ ‘lơ̆ng hlŏh dơ̆ng Trong pơ prŏ atŏk tơ iung muk drăm-tơpôl 5 sơnăm 2021-2025 păng trong iung jang kăl lơ̆m 10 sơnăm 2021-2030 kiơ̆ Tơdrong tơchơ̆t Pơm lêh hop akŏm Đảng ‘măng mă XIII.

Tơblơ̆ nơ̆r: Amazưt