VOV4.Bahnar - Adrol kơ ‘nŏh, kơ sơ̆ 28/10/2021, Thủ tướng Phạm Minh Chính chĕp kơ̆l khul tang măt ăn Việt Nam vang Hôp trư̆k tuyê̆n tih ASEAN-Nga ‘măng mă 4 tơ băt 30 sơ năm pơ jing tơ drong pơ vei ASEAN-Nga. Kơ dră chĕp kơ̆l dôm tĕh đak ASEAN, Kơ dră tơm tĕh đak Nga Vladimir Putin păng Tổng Thư ký ASEAN vang truh hăm hop akŏm âu. Dôm kơ dră chĕp kơ̆l pơ ma hơ dăh tơ drong gĭt kăl đơ̆ng tơ băt 30 sơ năm pơ vei ASEAN-Nga, hôn bơ nê dôm tơ drong yak tŏk pran ‘lơ̆ng lơ̆m tơ drong pơ vei jang hơ doi gĭt kăl ASEAN-Nga păng drơ̆ng nơ̆r hăm trong jang tôm tơ drong đơ̆ng 2021-2025.

ASEAN păng Nga pơ ma hơ dăh vă jang hơ doi kơ jăp, khŏm tang găn jĭ COVID-19, jang hơ doi găh tơ drong adrin pơ truh vắc xin sơ đơ̆ng, đei yoa păng hơ tŏ băl truh hăm kon pơ lei lơ̆m tơ ring. 2 păh drơ̆ng nơ̆r hơ tŏk tơ drong jang hơ doi, pơ ma nuh, roi tơ băt ăn băl găh tơ drong tơ jră hăm tơ drong nol, tơ gop ăn tơ drong rơ ngei, sơ đơ̆ng tơ̆ tơ ring, nhen vang pơ gơ̆r pơ ma nuh tih găh dôm tơ drong sơ đơ̆ng, păng pơ ma nuh ASEAN-Nga găh tơ drong sơ đơ̆ng lơ̆m kơ măy kơ mŏk ‘nao. Dôm tĕh đak drơ̆ng nơ̆r sơ năm 2022 ‘nŏh jĭ sơ năm jang hơ doi Khoa hŏk-Ki thuơ̆t păng kơ măy kơ mŏk ASEAN-Nga, pơ kăp jang hơ doi vang tưk tơ iung tĕch mơ dro, tơ mât jên jang, jang tơ iung ming dơ̆ng păng vei sơ đơ̆ng dôm trong jang xa, chơ pơ truh tơ mam, hơ tŏk tơ drong jang hơ doi đơ̆ng Khul jang mŭk drăm Á-Âu (EAEU) hăm ASEAN.

Dơ̆ng: Tơ blơ̆