VOV4.Bahnar - Drơ̆ng nơ̆r krao hơ vơn đơ̆ng kơ dră tơm teh đak Đại Hàn Dân Quốc Moon Jae In, năr ‘nâu (31/5),Thủ tướng teh đak Phạm Minh Chính vang Hop akŏm tih jang hơ dai găh hơ tŏk tơ iung rơ goh ‘lơ̆ng păng tơ drong tơm jơ̆p plei teh 2030 (P4G) kiơ̆ trong trực tuyến. Hop akŏm đei hơ len lăng đei tơ drong ‘lơ̆ng gĭt kăl lơ̆m khei ‘năr tơ jră hăm tŏ ‘mi kial tơ plih păng tơ iung ming rơ goh ‘lơ̆ng jing tơ gŭm hơ drol tih hloh đơ̆ng rim teh đak. ‘Nâu jĭ hop akŏm tih jang hơ dai găh hơ tŏk tơ iung rơ gŏh ‘lơ̆ng păng tơ drong tơm jơ̆p plei teh ‘măng mă 2.

Thủ tướng Phạm Minh Chính

Hăm tơ drong vang akŏm đơ̆ng vă jê̆ 60 kơ dră chĕp kơ̆l, kơ dră kơ pal truh đơ̆ng lơ teh đak, Hop akŏm sơ năm ‘nâu gô akŏm pơ ma dơ nuh rim tơ drong tơm jang tơ hai apŭng plĕnh teh yua kơ tơ drong tơm tơ iung ming rơ goh ‘lơ̆ng đơ̆ng rŏng rơ hiŭng rơ huăng COVID-19. Hop akŏm tih jang hơ dai găh hơ tŏk tơ iung rơ goh ‘lơ̆ng păng tơ drong tơm jơ̆p plei teh jĭ trong jang pơ ma dơ nuh lơ̆m noh rim teh đak jang lơ̆m khŭl tơ gŭm jên, oei rim grŭp jang, anih jang mơ dro sa păng kon pơ lei pơ gơ̆r rim tơ drong jang. Tơ drong tơm ‘noh tơ gŭm rim teh đak tŏk bŏk hơ tŏk tơ iung oei kơ kĕ tơ răn lơ̆m tơ drong tơ jră hăm tơ drong tơ lĕch hơ yuh ‘mê̆ ‘mach pơm ư̆h kơ ‘lơ̆ng hnam kơ mil.

Thuem: Tơ blơ̆