VOV4.Bahnar - Pơgê năr 27/10 hlôi pơgơ̆r Hop akŏm Kơdră kơpal ASEAN-Nhật Bản ‘măng mă 24. Thủ tướng Tĕh đak Phạm Minh Chính chĕp kơ̆l Khŭl kơdră tang măt Việt Nam vang năm hop akŏm atŭm hăm Kơdră chĕp pơgơ̆r rim tĕh đak ASEAN, Thủ tướng Nhật Bản Kishida Fumio hăm Tổng Thư ký ASEAN.

Iung pơma tơ̆ Hop akŏm, Thủ tướng Phạm Minh Chính sơkơ̆t hơdăh Việt Nam gô hơnơ̆ng tơgop kơtang, hơnhăk tơgoăt tơgoăl ƀar păh kơtang hlŏh dơ̆ng, jơnei hlŏh dơ̆ng păng tơpă hlŏh dơ̆ng. Thủ tướng pơma hơdăh, ƀar păh kăl iung jang hơdoi kơ jăp lơ̆m hơmet pơ ‘lơ̆ng păng sơđơ̆ng rim trong jang hơdoi hlôi pơdơ̆h kơ yuơ jĭ hơbŭh Covid-19 pơm ăn, pơjing rơvơn păng tơgŭm djru kơtang vă rim hơnĭh mơdro sa, bơngai tơmơ̆t jên jang Nhật Bản vei kơ jăp sơđơ̆ng jang sa pơm tơlĕch tĕch mơdro tơ̆ tơring păng Việt Nam. Thủ tướng jei athei Nhật Bản tơgŭm ASEAN hơnơ̆ng tơgŭm djru ASEAN atŏk tơ iung hơtŏ dĭh băl, jơ̆p jang, kơ jăp tơ̆ rim tơring oei tim mă gan atŏk tơ iung, lơ̆m au đei tơring iĕ Mekong ‘moi kiơ̆ trong jang hơdoi Mekong-Nhật Bản.

Tơblơ̆ nơ̆r: Amazưt