VOV4.Bahnar - Pơ gê ‘năr 22/6 tơ̆ anih jang kơ Anih tơm vei lăng Kŏng an, Thủ tướng teh đak Phạm Minh Chính vang pơm lêh pơ tôch pơ jing, tơ lĕch jang tơ drong jang anih mong răk hla ar kăl teh đak găh kon pơ lei oei sa; tơ drong pơm tơ lĕch, asong păng vei lăng Kăn kươk kon pơ lei păng lêh tơ băt hơ dăh vei lăng tơ drong jang đơ̆ng ‘năr 1/7/2021. Pơ ma tơ̆ jơ pơm lêh, tang măt kơ dră chĕp kơ̆l Đảng, teh đak, Thủ tướng teh đak Phạm Minh Chính pôk pơ ư dôm tơ drong hơ drin păng jơ nei iŏk đei đơ̆ng Anih tơm vei lăng Kŏng an, kŏng an rim tơ ring; hơ drin tơ gŭm jang hơ dai, vang jang đei iŏk yua đơ̆ng rim anih jang mơ dro sa kơ măy kơ mŏk kơ tơ̆ng ang lơ̆m rim tơ drong jang, tơ gop pơ jing anih mong răk hla ar kăl teh đak găh kon pơ lei oei sa đơ̆ng Việt Nam.

Thủ tướng pơ ma hơ dăh, ‘nâu jĭ dôm hơ năp jang gĭt kăl, iŏk yua ‘lơ̆ng, đei yua đunh đai mă lei long nol tơ̆ hơ năp oei lơ. Thủ tướng akhan, tơ drong pơ jing tơ drong jang jơ nei ‘nao lăp jing yak blŭng, hơ nhăk anih mong răk hla ar kăl âu lơ̆m tơ drong arih sa, hơ tŏk đei iŏk yua tơ pă, kon pơ lei păng anih jang mơ dro sa đei sa yua ‘nao ‘noh jĭ tơ drong ‘mĕh vă đơ̆ng Đảng, teh đak; tơ drong răp gô păng hơ mĕng đơ̆ng tơ pôl păng đơ̆ng đĭ đăng kon pơ lei.

Thuem: Tơ blơ̆