VOV4. Bahnar - Pơgê năr 22/12 tơ pơlei tơm Đồng Hới, dêh char Quảng Bình, Khŭl kơdră chĕp pơgơ̆r Trung ương Đảng, Kuô̆k hô̆i, Kơdră chĕp pơgơ̆r Tĕh đak, Khŭl kơdră  tĕh đak, Dơnŏ anĭh Trung ương Mặt trận tổ quốc Việt Nam păng dêh char Quảng Bình pơgơ̆r pơm lêh tơbăt 110 sơnăm Năr rơneh Đại tướng Võ Nguyên Giáp (25/8).

Thủ tướng Tĕh đak Phạm Minh Chính vang năm păng đŏk nơ̆r tơbăt tơ̆ pơm lê̆h tơbăt. Tơ̆ Lêh tơbăt, Thủ tướng Tĕh đak Phạm Minh Chính sơkơ̆t hơdăh kon bơngai, jơhngơ̆m đon păng dôm tơdrong tơgop tĭh tên đơ̆ng Đại tướng hăm tơdrong jang kĕch mang Việt Nam păng lơ̆m apŭng plĕnh tĕh gô ling lang gei kơ jăp lơ̆m chăl sơnăm kơ hơdrĕch hơdrung bơ̆n păng chăr sơnăm bơ̆ jang kĕch mang apŭng plĕnh tĕh. Ƀlep lơ̆m jơ Pơm lê̆h au, tang măt ăn Kơdră chĕp pơgơ̆r Đảng, Tĕh đak, Thủ tướng Phạm Minh Chính athei, rim kơdră, hơnĭh jang, rim tơring păng ‘mĕh vă rim kang ƀô̆, ƀô̆ đô̆i hơnơ̆ng kiơ̆ yok rok jơ̆ng hlŏh dơ̆ng jơhngơ̆m đon tơgoăt tơgoăl mĭnh nơ̆r, vang kơrŭn jơhngơ̆m vang iung jang kơ pơ đĭ khŭl jang chĭnh trĭ, kon pơlei lơ̆m tĕh đak, kon pơlei oei tơ̆ tĕh đak đe hơnơ̆ng atŏk kơtang jơhngơ̆m đon ‘mêm kơ eng tĕh đak, jơhngơ̆m đon kơchăng iung jang, hơdrin jang, jơhngơ̆m pran tơgoăt tơgoăl hơdrĕch hơdrung păng tơdrong ‘mĕh vă atŏk tơ iung kơtang, hơdrin yak hlŏh tơnap tap, tơdrong long ƀơt măt, hơdrin jang kiơ̆ jơnei Tơdrong tơchơ̆t Pơm lê̆h hop akŏm mă XIII kơ Đảng.

Tơblơ̆ nơ̆r: Amazưt