VOV4.Bahnar - J^ khul linh io\k jang pơm ‘lơ\ng ăn tơ drong tơ roi tơ băt, klo\h kle\ch ăn đ^ đăng khul linh, mă loi j^ lơ\m chăl ‘nao, dôm kơ măy kơ mo\k tơ roi tơ băt kơ khul linh roi ‘nao ‘lơ\ng, đe kăn [o#, linh Tiểu đoàn tơ roi tơ băt 29, An^h tơm jang tơ gu\m kơ khul linh hơ nơ\ng ho\k pơ hrăm, kơ chăng tơ blăh lơ\m rim tơ drong.

Tiểu đoàn Tơ roit ơ băt 29, An^h tơm jang tơ gu\m kơ khul linh, Quân đoàn 3 j^ 1 lơ\m 4 khul linh đei tơ gu\m bơ\n kơ măy kơ mo\k, gre linh ‘nao hlo\h kơ binh đoàn. Tơ drong ‘no\h athei rim kăn [o#, linh lơ\m tiểu đoàn đei jơ hngâm pran ‘lơ\ng păng jang rơ gei ‘mơ\i gơ\h hlôh vao hơ dăh rim kơ măy kơ mo\k. Hăm trong pơ tho pơ hrăm “rơih io\k tơ drong kăl, đei yoa tơ\ yăn âu, hlôh vao hơ dăh, lăp hăm trong tơ blăh đơ\ng đ^ đăng quân đoàn”, An^h jang Đảng, yo\ng che\p kơ\l tiểu đoàn hơ nơ\ng pơ tho tơ [ôh ăn [ô đo#i hơ to\k đon jang tơ năp, tơ guăt kơ jăp 1 [ơ\r đon. Găh no\h dơ\ng, tiểu đoàn krao hơ vơn kăn [o#, linh hơ met ming pơ ‘lơ\ng, pơm ‘nao tơ mam ho\k pơ hrăm păng an^h pơ tâp tơ blăh vă pơ tâp pơ hrăm. Dôm tơ drong ‘nâu vang tơ gop tơ [ôh jơ hngâm đon ho\k pơ hrăm tơ păt ‘lơ\ng ăn đ^ đăng khul linh, mă loi j^ linh hle.

Binh nhất Trần Công Bằng, Đại đội 4, Tiểu đoàn 29 pơ ma: “Đei đe yo\ng pơ tho tơ [ôh găh vei sơ đơ\ng tơ drong tơ roi tơ băt păng jang kiơ\ ki luât găh vei sơ đơ\ng tơ drong tơ roi tơ băt, inh [ôh tơ drong tơ roi tơ băt tôch g^t kăl lơ\m tơ drong pơ tâp pơ hrăm, tơ drong tơ blăh, inh adrin ho\k pơ hrăm vă hơ to\k tơ drong rơ gei, pơm kiơ\ ‘lơ\ng ki luât đơ\ng đe yo\ng tơ jur, mơ\ng nơ\r pơ ma, nơ\r pơ tho đơ\ng bôl boăl jang hơ drol tơ roi ăn.”

Hơ dai hăm tơ drong pơ tâp pơ hrăm kơ chăng tơ blăh, Tiểu đoàn Tơ roi tơ băt 29 oei năng kăl truh tơ drong krao hơ vơn kon pơ lei tơ\ tơ ring oei. Kiơ\ kơ ‘no\h, dôm đại đội lơ\m tiểu đoàn hơ nơ\ng pơ gơ\r ngôi pơ chơt, pơm po# [ăn hăm dôm pơ lei pơ la lơ\m tơ ring. Đơ\ng no\h, khul linh gơ\h băt hơ dăh rim tơ drong, vă vei lăng ‘lơ\ng tơ drong sơ đơ\ng chinh tr^ hai, vang tơ gu\m ăn kon pơ  lei tơ\ tơ ring jang ato\k tơ iung mu\k drăm, man an^h jang, pơm trong hai. {ât blu\ng khei 6 âu ki, tiểu đoàn athei 100 ‘nu linh vang jang hăm kon pơ lei xăh Ia Pêch, apu\ng Ia Grai, dêh char Gia Lai hơ met pơ ‘lơ\ng hiong răm đơ\ng sar bar, pơm hơ met ming dôm j^t to\ hnam kial tak păr bơ bu\ng, hơ păh vă je# 500 blăh hơ băn ao, hla ar ho\k ăn ho\k tro tơ nuh ho\k rơ gei, pơ gơ\r khăm hơ met j^ tơ\ lơ tơ ring lơ\m apu\ng…

Đại úy Lê Nhật Vũ, Kơ dră che\p kơ\l Đại đội 4, Tiểu đoàn 29, An^h tơm jang tơ gu\m kơ Khul linh, Quân đoàn 3 pơ ma: “Nhôn hơ nơ\ng pơ ma nu\h hăm khul kơ dră tơ ring păng dôm khul gru\p tơ\ tơ ring. M^nh ‘no\h vă gơ\h băt rim tơ drong tơ\ tơ ring, mă 2 dơ\ng đei tơ drong pơ vei băl đơ\ng tơ ring hăm khul linh, vang jang ‘lơ\ng 1,2 tơ drong jang kơ druh dăm, pơ gơ\r đă [o\ng lo\ng tơ plo\ng kơ dâu. Oei tơ drong jang chinh tih [iơ\ ‘no\h lăng năng rim khul lơ\m tiểu đoàn, mưh đei tơ drong jang ‘no\h nhôn io\k jang hloi.”

Nguyễn Thảo: Chih

Dơ\ng: Tơ blơ\