VOV4.Bahnar - Pơ gê ‘năr (12/12), ƀlep 90 sơ năm năr pơ gơ̆r iung jang tơ jră hăm tơ drong hrăt hrot đơ̆ng dôm bơ ngai pơ nă cộng sản tơ̆ Hnam pơ nă Kon Tum pơm tơ drŏ ưh khan lăp tơ̆ Kon Tum, tơ̆ Việt Nam mă tơ̆ jơ̆p lơ̆m Đông Dương, Anih jang Đảng dêh char, Jơ nŭm pơ gơ̆r kon pơ lei, Anih vei lăng kon pơ lei, Anih jang Mặt trận tổ quốc Việt Nam dêh char Kon Tum pơ gơ̆r Lêh tơ băt 90 sơ năm iung jang tơ jră tơ drong hrăt hrot vă pơ đâu dơ̆ng tơ drong joăt joe jơ hnơr arih kach mang pran kơ tang đơ̆ng hơ drĕch hơ drŭng; ƀlŏk hơ dơ̆r tơ drong nuih mơng, plang hơ kâu đơ̆ng rim khŭl linh cộng sản lơ̆m iung tơ blăh ayăt Phalăng păng khŭl đĭch đam tơ̆ Hnam pơ nă Kon Tum. Hnam pơ nă Kon Tum yua đơ̆ng ayăt Phalăng ming man đơ̆ng dôm sơ năm 1915-1917, jĭ anih chĭt kron bơ ngai pơ nă chĭnh trĭ đei pơm hrôih hloh tơ̆ tơ ring Tây Nguyên.

Lêh tơ băt 90 sơ năm iung tơ jră tơ drong hrăt hrot tơ̆ Hnam pơ nă Kon Tum

Đei khei ‘năr Hnam pơ nă Kon Tum chĭt kron hloh 500 ‘nu bơ ngai pơ nă chĭnh trĭ. Kơ sư̆k păr ang đơ̆ng ‘măng iung tơ jră vei răk pham păng ơ̆t tơ̆ Hnam pơ nă Kon Tum  lơ̆m khei 12 sơ năm 1931 athei ayăt Phalăng măh tơ plih trong vei lăng kơ hret, chu pơm kiơ̆ trong athei đơ̆ng rim bơ ngai pơ nă chĭnh trĭ tơ lĕch ăn, hŭt lê̆ tơ drong ming man trong 14; mă loi ‘noh truh sơ năm 1934 ayăt Phalăng athei tơ klăh pơ đĭ khŭl jang Hnam pơ nă Kon Tum, hŭt hloi Hnam chĭt kron Kon Tum.

Thuem: Tơ blơ̆