VOV4.Bahnar - Pơ gê ‘năr (31/8), tơ̆ Hà Nội, Anih jang kơ ƀok Kơ dră teh đak pơ gơ̆r hop akŏm tơ roi tơ băt hơ dăh tơ drong tơ chơ̆t hơ chăng ăn brŏk đơ̆ng hnam pơ nă hrôih sơ năm 2021 đơ̆ng Kơ dră teh đak ăn kơ dôm bơ ngai yoch tŏk bŏk pơm kiơ̆ phak oei lơ̆m hnam pơ nă păng bơ ngai pơ nă tŏk bŏk đei pơ dơh pơm kiơ̆ phak oei lơ̆m hnam pơ nă đei tơ drong ‘lơ̆ng gơh hơ chăng ăn brŏk đơ̆ng hnam pơ nă hrôih kiơ̆ tơ drong hơ găt đơ̆ng khôi luơ̆t. Sơ năm ‘nâu, kơ dră teh đak hlôi kĭ tơ chơ̆t hơ chăng ăn brŏk hrôih đơ̆ng hnam pơ nă ăn kơ 3 rơ bâu 026 ‘nu bơ ngai pơ nă tŏk bŏk pơm kiơ̆ oei lơ̆m hnam pơ nă păng 3 ‘nu tŏk bŏk đei athei pơ dơh ‘mơ̆i pơm kiơ̆ phak oei lơ̆m hnam pơ nă, 6 ‘nu tŏk bŏk đei pơ dơh ‘mơ̆i phak oei lơ̆m hnam pơ nă, đei tôm tơ drong ‘lơ̆ng đei yua hơ chăng ăn brŏk hrôih đơ̆ng hnam pơ nă sơ năm 2021. Pơ ma păng tơ băt hơ dăh tơ drong tơ chơ̆t hơ chăng ăn brŏk đơ̆ng hnam pơ nă hrôih sơ năm 2021, ƀok Phạm Thanh Hà, Phŏ Kơ dră Anih jang kơ ƀok kơ dră teh đak tơ băt lơ̆m kơ plăh hơ len hơ chăng ăn brŏk đơ̆ng hnam pơ nă hrôih adoi athei pơm kiơ̆ dôm tơ drong kăl, ‘noh jĭ athei đei pơ gơ̆r vei sơ đơ̆ng tơ păt, kơ jăp, rơ đăh, ƀlep bơ ngai păng ƀlep tơ drong đei hơ găt vă đĭ đăng dôm bơ ngai pơ nă đei tôm tơ drong ‘lơ̆ng gơh hơ len lăng păng ưh kơ lê̆ bơ ngai pơ nă hơ yơ ưh kơ tôm tơ drong ‘lơ̆ng kiơ̆ tơ drong hơ găt ‘noh gơ̆h hơ len hơ chăng ăn brŏk đơ̆ng hnam pơ nă hrôih.

Thuem: Tơ blơ̆