VOV4.Bahnar - “Bơ ngai teh đak đe oei sa trŏ luơ̆t tơ̆ Việt Nam đei gơh hơ kŭm, pơ hrăm, krao khan kiơ̆ tơ drong hơ găt đơ̆ng Luơ̆t lui khop”. ‘Nâu jĭ nơ̆r pơ ma hơ dăh đơ̆ng phŏ kơ dră Anih tơm Nội vụ, Kơ dră Anih vei lăng tơ drong lui khop Khŭl kơ dră teh đak, Vũ Chiến Thắng tơ̆ jơ tơ ƀơ̆p bơ ngai teh đak đe hơ kŭm pơ hrăm, krao khan tơ̆ Việt Nam, đei Anih vei lăng găh lui khop Khŭl kơ dră teh đak pơ gơ̆r pơ gê ‘năr 27/4, tơ̆ Hà Nội. Vang akŏm jơ tơ ƀơ̆p muh măt đei ƀok pơ tho lui, tang măt hơ nih hơ kŭm pơ hrăm akŏm đơ̆ng bơ ngai teh đak đe, khŭl jang găh lui khop kŭm hăm bơ ngai tang măt rim anih tơm, anih jang, khŭl vei lăng tơ drong lui tơ̆ tơ ring. Tơ̆ jơ tơ ƀơ̆p muh măt bơ ngai tang măt hlôi lăng dôm um rup găh tơ drong arih sa hơ kŭm pơ hrăm tơ̆ Việt Nam; mơ̆ng bơ ngai jang tơ roi tơ băt dôm tơ drong jang ‘lơ̆ng đơ̆ng Luơ̆t lui khop, khôi luơ̆t găh mơ̆t lĕch đơ̆ng teh đak đe, tơ drong bơ̆ jang kiơ̆ pơ vih pơ văn teh đak trực tuyến lơ̆m tơ drong jang lui khop.... Kiơ̆ đơ̆ng ‘noh vă ‘mĕh vă bơ ngai teh đak đe tŏk bŏk hơ kŭm pơ hrăm tơ̆ hơ nih hơ kŭm pơ hrăm akŏm hlôh hơ dăh hloh khôi luơ̆t găh tơ drong lui khop, tơ drong pơm tơm păng tơ drong pơm kiơ̆ tơ drong gơ̆h hơ kŭm pơ hrăm hiôk hian đơ̆ng bơ ngai teh đak đe oei sa trŏ luơ̆t tơ̆ Việt Nam.

Thuem: Tơ blơ̆