VOV4.Bahnar - Vă tơ mam tơ moi tơ mang lăng păng bơ ngai răt yua sơ đơ\ng yua dôm rơ mam ‘lơ\ng rơ go\h, [lep hơ năn kơ Đà Lạt, de#h char Lâm Đồng to\k bo\k hăt hot tơ le\ch jang tơ drong tơ chă hơ len tơm a dôm tơ mam ‘lơ\ng hăm phần mềm pơ chrang. Đà Lạt – Lâm Đồng dang ei đei [o#h 183 an^h pơm tơ le\ch păng te\ch mơ dro dôm tơ mam ‘lơ\ng Đà Lạt, lơ\m no\h găh lơ ‘no\h j^ pơm tơ le\ch ư\h kơ hăm kơ măy.

Tơ drong jang tơ gu\m bơ ngai răt yua tơ chă hơ len tơm a dôm tơ mam ‘lơ\ng kơ Đà Lạt

Khei ‘năr âu ki, tơ mam ‘lơ\ng Đà Lạt hlôi mơ\t pơ răm kơ tang yua kơ lơ tơ mam ư\h kơ đei băt an^h pơm tơ le\ch. Tơ drong âu pơm hiong răm t^h găh mu\k drăm, [ơm ư\h kơ ‘lơ\ng đon lui, hơ năn tơ mam drăm đơ\ng cho\h jang sa Đà Lạt păng tơ drong gơ\h yua đơ\ng bơ ngai răt yua.

Tơ drong jang “ Pơ jing an^h ch^h răk, tơ mơ\t yua kơ măy kơ mo\k kơ tơ\ng ang vei lăng, tơ chă hơ len tơm a dôm tơ mam ‘lơ\ng Đà Lạt” đei de#h char tơ le\ch jang vă hơ met ming kơ jăp tơ drong ‘nâu. Bơ ngai răt yua gô tơ chă hơ len đei dôm kơ tơ\ng ang găh tơm a tơ mam kiơ\ kơ so# đei in lơ\m tơ pu tơ mam hăm phần mềm pơ chrang lăng ako\m lơ\m điện thoại hơ gei.

Thuem: Tơ blơ\