VOV4.Bahnar - Kơ sơ̆ 17/8, hơ nơ̆ng bơ̆ jang lơ̆m hop akŏm mă 2, Anih chĕp kơ̆l pơ gơ̆r Kuô̆k hô̆i tơ gop nơ̆r găh tơ drong hơ găt păng kơ sô̆ jên vă tơ lĕch jang hơ nơ̆ng đơ̆ng jên tĕh đak lơ̆m sơ năm 2022.

Kơ dră Kuô̆k hô̆i Vương Đình Huệ

Mĭnh tơ drong đei lơ nơ̆r tơ gop lơ̆m hop akŏm ‘nŏh jĭ trong jang jên hu gĭt kăl. Khul kơ dră tĕh đak athei, dôm anih jang oei jang kiơ̆ trong jang jên hu, đei iŏk yoa pha ƀiơ̆ tơ̆ 1,2 anih jang hơ nơ̆ng asong jang kiơ̆ lơ̆m sơ năm 2022 klep truh bơ̆ jang hơ met ming jên khei lơ̆m ‘năr 1/7/2022.

Anih vei lăng jên hu athei Khul kơ dră tĕh đak tơ blang mă hơ dăh ƀiơ̆ vă pơm ‘lơ̆ng tơ drong gơ̆h jang kiơ̆ păng lăp hăm dôm trong jang hơ met ming jên khei păng dôm hla ar chih tơ băt tơ drong hơ găt, kơ sô̆ jên kla hơ nơ̆ng lơ̆m khei ‘năr vei sơ đơ̆ng jên tĕh đak đơ̆ng 2022 - 2025. Găh tơ drong ‘nâu, Kơ dră Kuô̆k hô̆i Vương Đình Huệ pơ ma hơ dăh, tơ drong tơ chơ̆t đơ̆ng Trung ương hlôi chih hơ dăh tơ drong hơ met ming jên khei athei pơ gơ̆r lơ̆m ‘năr 1/7/2022, kiơ̆ kơ ‘nŏh, kiơ̆ kơ ‘nŏh rim trong jang pơ ‘nhŏ ăn iŏk yoa hơ drô̆ athei hŭt đĭ.

Dơ̆ng: Tơ blơ̆