VOV4.Bahnar - Khei 11 sơ năm sơ̆, pơ ma tơ̆ Quốc hội, Thủ tướng Nguyễn Xuân Phúc tơ lĕch trong jang pơ tăm 1 ti tơm ‘long lơ̆m 5 sơ năm 2021-2025. ‘Năr 31/12/2020, Thủ tướng kĭ tơ lĕch Tơ drong tơ chơ̆t kơ sô̆ 45 găh pơ gơ̆r tơ drong jang “ Têt pơ tăm ‘long” păng hơ tŏk loi dơ̆ng tơ drong jang vei lăng, hơ tŏk tơ iung bri iŏk đơ̆ng blŭng sơ năm 2021 hloi. Kŭm hăm lơ̆m teh đak, rim dêh char tơ̆ tơ ring Tây Nguyên kŭm tŏk bŏk hơ drin jang kiơ̆ tơ drong jang pơ tăm 1 ti tơm ‘long – Yua kơ mĭnh Việt Nam rơ goh ‘lơ̆ng.

‘Nao âu, tơ̆ pơ lei tơm Gia Nghĩa, Anih vei lăng kon pơ lei dêh char Dak Nông hlôi pơ gơ̆r Lêh jang kiơ̆ tơ drong jang pơ tăm 1 ti tơm ‘long. Hăm hơ năn “Yua kơ mĭnh Việt Nam rơ goh ‘lơ̆ng” tơ drong jang hlôi sơng đei hloh 200 ‘nu kang ƀô̆, bơ ngai jang teh đak, đoàn viên, hơ druh tơ dăm păng kon pơ lei tơ̆ pơ lei tơm Gia Nghĩa vang jang kiơ̆. Đơ̆ng rŏng lêh tơ lĕch jang, hloh 300 tơ nơm ‘long tơ giĕr găm hlôi đei rim bơ ngai vang pơ tăm tơ̆ rim jăl trong găh tơ ring oei hle Đắk Nur B, phường Nghĩa Trung, pơ lei tơm Gia Nghĩa. Ƀok Lê Trọng Yên, Phŏ kơ dră Anih vei lăng kon pơ lei dêh char Dak Nông tơ băt, tơ drong jang pơ tăm ‘long kơ dêh char gô hơ nơ̆ng đei tŭn pran, sơng đei lơ khul jang tơ pôl vang jang.

“Dêh char gô pơ jing rim trong jang tơ gŭm vă tơ gŭm pơ tăm ‘long pơm yơ̆p, pơ tăm ‘long choh jang sa hăm ‘long bri, mă pêng ‘noh pơ tăm bri akŏm, mă 4 hơ tŏk tơ iung pran găh pơ tăm bri mŭk drăm. Dôm ‘long đei băt hơ dăh ‘noh jĭ long bri hai ‘long hcoh jang sa hai pơ tih gia nhen ‘long kơ su, ‘long điêu, ‘long mắc ca, dôm ‘long tơ roi kơ pal nhôn gô pơ tăm tơ̆ dôm tơ ring đei tŏ ‘mi kial lăp. Dêh char Dak Nông hơ drin truh sơ năm 2025 gô hơ tŏk tơ drong pĕng yơ̆p bri kơ dêh char tok hloh 40%”.

Thủ tướng vang năm pơm lêh jang kiơ̆ tơ drong tơ drong jang pơ tăm 1 tyi tơm ‘long tơ̆ Nghệ An

Hơ tuch khei 3 âu ki, dêh char Gia Lai kŭm pơ gơ̆r lêh tơ lĕch jang pơ tăm ‘long “ Yua kơ mĭnh Việt Nam rơ goh ‘lơ̆ng” tơ̆ xăh Biển Hồ, Pleiku. Tơ̆ âu, ƀok Võ Ngọc Thành – Kơ dră Anih vei lăng kon pơ lei dêh char Gia Lai tơ băt, tơ ring yak truh tơ drong hơ găt pơ jing dêh char jing “ groi kông rơ gŏh ‘lơ̆ng yua kơ jơ hngơ̆m pran”; pơ tăm ‘long, pơ tăm bri ư̆h khan lăp  jing tơ drong cham char, mă oei ƀơm truh hơ tŏk tơ iung mŭk drăm tơ pôl, jŏh ayŏ  păng tơ mang lăng. Lơ̆m 5 sơ năm âu ki, dêh char hlôi pơ tăm 20 rơ bâu hek tar bri păng ‘long pơm yơ̆p. Tơ drong tơ chơ̆t Hop akŏm bơ ngai tang măt Đảng bộ dêh char Gia Lai ‘măng mă 16, jăl jang 2021-2025 kŭm tơ lĕch ăn tơ drong hơ găt pơ tăm ‘nao 40.000 hek tar bri, hơ tŏk tơ drong pĕng yơ̆p bri kơ dêh char tŏk 47,75% lơ̆m 5 sơ năm truh. Vang pơm lêh pơ tăm ‘long, ƀok Lưu Trung Nghĩa, Kơ dră Anih vei lăng găh chŏh jang sa păng hơ tŏk tơ iung tơ ring tơ rang Gia Lai tơ băt:

         “Anih vei lăng găh choh jang sa păng hơ tŏk tơ iung tơ ring tơ rang gô jang tơ gŭm Anih vei lăng kon pơ lei dêh char athei rim apŭng, thị xăh, pơ lei tơm pơ gơ̆r lêh pơ tăm ‘long, proh hơ met pơ tăm ‘long kiơ̆ proh hơ met, kăp gĭt, đei kơ jă găh tơ mam pơ rŏ, găh cham char păng vei răk yen  vă pơm hơ drĕch yen.”

        Tơ̆ jơ pơm lêh tơ lĕch jang pơ tăm ‘long “ Yua kơ mĭnh Việt Nam rơ gŏh ‘lơ̆ng” tơ̆ pơ lei tơm Pleiku, Kơ dră chĕp kơ̆l Anih mong jên  găh chŏh jang sa păng hơ tŏk tơ iung tơ ring tơ rang Việt Nam hlôi pơ jao 5 ti hlak jên tơ gŭm jên mong vei lăng sơ đơ̆ng tơ drong arih sa tơ pôl kơ tơ ring, păng 1 ti hlak jên pơm jên jang pơ tăm ‘long. Oei tơ̆ Dak Lak, jang kiơ̆ tơ drong jang pơ tăm ‘long, pơm bri, bơ̆ jang yua kơ cham char, Đoàn viên hơ druh tơ dăm Anih mong jên păng hơ tŏk tơ iung tơ ring tơ rang dêh char Dak Lak hlôi pơ gơ̆r pơ tăm hloh 300 tơ nơm ‘long tơ giĕr tơ̆ Lâm viên pơ lei tơm Buôn Ma Thuột. ‘Nâu kŭm jing tơ drong jang oei lơ̆m trong tơ lĕch jang pơ tăm 1.000 tơ nơm ‘long tơ̆ dôm hơ nih ngôi pơ chơt, trong kơ phô̆, jih trong gre, bri tang găn kơ Agribank Dak Lak. Ƀok Phan Thông Thái, Kơ dră Công đoàn, Phŏ Kơ dră vei lăng Anih mong jên Agribank tơ̆ dêh char Dak Lak tơ băt:

“Nhôn đei tơ drong jang pơ tăm 1.000 tơ nơm ‘long, lơ̆m noh nhôn klăih song ăn 19 công đoàn tơ ring, công đoàn khŭl jang kơ anih jang vă pơ tăm tơ̆ 8 apŭng, pơ lei tơm. Hăm kơ sô̆ vă jê̆ 200.000 tơ moi ‘noh nhôn hơ mĕng tơ roi tơ băt ăn kơ dang 20% ‘noh hlôi tôch kơ ‘lơ̆ng bơ̆ih. Yua kơ đơ̆ng noh ‘noh đe sư tơ roi tơ băt dơ̆ng kiơ̆ kơ sô̆ nhân, đe sư gô tơ roi ăn ŭnh hnam, kon hơ ‘lơ̆p, kơ tum kơ tŏng ‘nhŏng oh, kơ sô̆ gô tôch kơ lơ.”

Kon pơ lei Gia Lai jang kiơ̆ lêh pơ tăm ‘long

Pơ ma tơ̆ “Tết pơ tăm ‘long” pơ yan pŭih mak Tân Sửu âu ki tơ̆ dêh char Phú Yên, Thủ tướng Nguyễn Xuân Phúc tơ băt, kŭm hăm rim tơ drong jang đơ̆ng anih jang găh chŏh jang sa păng rim tơ ring lơ̆m hơ drin vei răk păng hơ tŏk kơ sô̆ pĕng yơ̆p kơ bri, pơ cheh pơ tăm 1 ti tơm ‘long gô ư̆h khan lăp tơ gop pơm tơ ƀĕnh ‘long ăn teh hŏh, kông kơ dăng, mă oei pơm rơ goh ‘lơ̆ng anih kơ drơ̆m păng tơ ring tơ rang Việt Nam.

“ ‘Nâu jĭ tơ drong tôch kơ ‘lơ̆ng nhen nơ̆r Ƀok Hồ bơ̆n hlôi đei tơ ƀôh hơ dăh, tơ drong ‘nâu dă ƀiơ̆ hoach mă lei đei yua lơ tơ gop gĭt kăl lơ̆m tơ drong hơ met ‘lơ̆ng tơ drong arih sa kon pơ lei păng bơ̆n ƀlŏk dơ̆ng đơ̆ng mơ mat tat đơ̆ngt ơ drong jang lơ̆m tơ blăh vang năm hơ dai hăm pơ jing teh đak mă lei kơ dih Ƀok Hồ bơ̆n ‘noh jĭ bơ ngai mă blŭng kơ tă tơ lĕch jang têt pơ tăm ‘long lơ̆m ‘năr 28/11/1959 yua kơ mĭnh Việt Nam rơ goh ‘lơ̆ng hơ iă hloh dăh mă mĭnh Việt Nam rơ goh ‘lơ̆ng ‘noh jĭ nơ̆r tơ ma tơm đơ̆ng Tơ drong jang 1 ti tơm ‘long.”

Hơ druh tơ dăm Dak Nông hơ drin pơ tăm ‘long

Hơ tuch khei 3 âu ki, tơ̆ Anih  gru groa jơ hnơr arih Hơ drŭh tơ dăm xung phong Truông Bồn, xăh Mỹ Sơn, apŭng Đô Lương, dêh char Nghệ An, Thủ tướng Nguyễn Xuân Phúc hơ nơ̆ng năm pơm lêh jang kiơ̆ tơ drong jang pơ tăm 1 ti tơm ‘long – Yua kơ mĭnh Việt Nam rơ goh ‘lơ̆ng. Pơ ma hơ dăh kơ mâu jơk ‘noh jĭ kơ mâu kơ tơ drong hơ nŭk hơ noa kơ mâu kơ tơ drong chek lar hơ tŏk tơ iung kơ jăp, kơ lih thoi noh Thủ tướng krao hơ vơn rim khŭl jang, rim bơ ngai hơ nơ̆ng tơ gŭm, bơ̆ jang hăm rim tơ ring, rim anih jang vă lang să, pơ trŭt tơ drong jang têt pơ tăm ‘long, pơ tăm tơ ƀĕnh teh hoh, kông kơ dăng lơ̆m teh đak.

Thuem: Tơ blơ̆