VOV4.Bahnar - Kơ dră tơm jang tơ bôl Bùi Thanh Sơn hlôi pơ ma điên thoăi hăm Kơ dră tơm jang tơ bôl Canada Marc Garneau. Kơ dră jang tơ bôl Bùi Thanh Sơn pơ ma hơ dăh Việt Nam tơ chĕng ‘lơ̆ng Canada kơ chăng hơ tŏk tơ drong pơ vei hăm ASEAN păng Việt Nam; hơ iă hăm dôm tơ drong jơ nei đơ̆ng Canada lơ̆m tơ drong tang găn jĭ Covid-19; bơ nê dôm tơ drong tơ gŭm tôch đei yoa đơ̆ng Canada ăn Việt Nam lơ̆m tơ drong hơ met pơ ‘lơ̆ng hiong răm đơ̆ng tŏ ‘mi kial kơ nê̆ tơ̆ tơ ring Tŏk bŏk Việt Nam păng tơ jră hăm tơ drong jĭ Covid-19, mă loi ‘nŏh lơ̆m tơ drong sơng iŏk vắc-xin.

Găh kơ dih kâu, Kơ dră tơm jang tơ bôl Garneau pơ ma dơ̆ng nơ̆r pơ kăp tơ gŭm ăn Việt Nam păng dôm tĕh đak lơ̆m tơ ring sơng iŏk vắc-xin Covid-19. Năm truh ‘măng tơ băt 50 sơ năm pơ jing tơ drong pơ vei jang tơ bôl (1973-2023), 2 ‘nu Kơ dră drơ̆ng nơ̆r athei đei lơ trong jang mă hơ dăh vă tưk hơ tŏk hlŏh dơ̆ng tơ drong pơ vei tĕch mơ dro 2 pang tŏk truh 8 ti đôla lơ̆m 2 sơ năm truh, pơ lung anih tĕch mơ dro 2 tĕh đak tơ gĕch iŏk tơ drong tơ chơ̆t CPTPP, hơ tŏk tơ drong jang hơ doi găh pơ tho pơ hrăm, pơih xă tơ drong jang hơ doi găh jên hu, mŭk drăm kơ sô̆, tơ plih ‘nao rơ gei…

Dơ̆ng: Tơ blơ̆