VOV4.Bahnar - ‘Năr 27/4, Kơ dră tơm jang tơ bôl Bùi Thanh Sơn pơ ma điên thoăi hăm Kơ dră tơm jang tơ bôl Nga Sergei Lavrov. Lơ̆m jơ pơ ma nuh, ƀok Kơ dră Sergei Lavrov hơ iă ăn ƀok Bùi Thanh Sơn đei pôk pơm Kơ dră tơm jang tơ bôl Việt Nam. Ƀok kơ dră Sergei Lavrov hơ iă hăm dôm tơ drong jơ nei mưh jang tơ bôl đơ̆ng Việt Nam khei ‘năr tơ jê̆ âu, lơ̆m nŏh đei tơ drong iŏk jang kơ chưk pơm Kơ dră ASEAN 2020 păng jang pơ lơh lơ̆m Jơ nŭm vei lăng sơ đơ̆ng Liên hợp quốc jăl jang 2020 – 2021, tơ chĕng ‘lơ̆ng tơ drong jang roi tŏk đơ̆ng Việt Nam lơ̆m apŭng plenh tĕh păng tơ̆ tơ ring.

Ƀar ‘nu ƀok Kơ dră jang tơ bôl oei pơ ma nuh găh tơ drong jang hơ doi Việt – Nga, mă loi jĭ vang tang găn jĭ COVID-19 kŭm nhen jang hơ doi đơ̆ng 2 anih tơm jang tơ bôl, jang hơ doi đơ̆ng 2 tĕh đak lơ̆m rim khul grŭp, lơ̆m nŏh đei Jơ nŭm vei lăng sơ đơ̆ng Liên hợp quốc păng tơ̆ ASEAN. Ƀar ‘nu ƀok Kơ dră tơ ƀôh đon hơ pơi ‘mĕh tơ lĕch jang ‘lơ̆ng dôm tơ drong jang lơ̆m sơ năm jang hơ doi Việt – Nga sơ năm 2021.

Dơ̆ng: Tơ blơ̆