VOV4.Bahnar - Pơ gê 5/10, tơ̆ Hà Nội, Anih tơm vei lăng jang kơ măy, tĕch mơ dro jang hơ doi hăm Anih tơ chĕng hơ len Trong pơ jing hơ năn tơ mam păng pơ jei băl pơ gơ̆r hop akŏm "Tơ guăt trong tĕch mơ dro, hơ tŏk trong jang tŏk mŭk drăm". Hop akŏm vă hơ nơ̆ng tơ lĕch dôm trong tơ gŭm ăn tơ drong chơ chuĕn, tĕch mơ dro tơ mam kơ jăp ‘lơ̆ng, đei yoa, kăl đei lơ hlŏh dơ̆ng dôm trong jang gĭt kăl, đunh đai truh ning mônh.

Yoa ƀơm kơ nê̆ đơ̆ng jĭ Covid-19, dôm tơ drong tĕch mơ dro tơ mam, pơ vih pơ văn, jang xa ƀơm ưh ‘lơ̆ng ngăl. Iŏk yoa đơ̆ng chă tơ mang lăng, pơ vih pơ văn, et xa jur lơ, kon pơ lei ‘mơ ‘met jên răt tơ mam tôch ai. 9 khei sơ năm ‘nâu, akŏm đĭ đăng tơ mam tĕch le, iŏk yoa đơ̆ng tĕch tơ mam jur 7,1% pơ têng hăm khei âu sơ năm sơ̆.

Tơ̆ hop akŏm, dôm bơ ngai juăt jang oei tơ blang dôm tơ drong mơ mat tat, tơ drong răm tih mă mŭk drăm Việt Nam oei tơ jră, atŭm hăm ‘nŏh pơ ma nuh găh dôm trong tơ gŭm đơ̆ng khul kơ dră tĕh đak păng dôm tơ drong adrin đơ̆ng anih tĕch mơ dro vă druh kiơ̆ tơ drong tơ plih tơ̆ anih tĕch mơ dro vă hơ tŏk tơ drong jang tŏk mŭk drăm.

Dơ̆ng: Tơ blơ̆