VOV4.Bahnar - Trung ương Đoàn Thanh niên Cộng sản Hồ Chí Minh, Trung ương Khul druh dăm Việt Nam ‘nao pơ gơ̆r tơ lĕch tơ drong jang tơ gŭm kơ jă tơ mam yoa kăl ăn druh dăm công nhân păng kon pơ lei đei hơ năn “Tơ gŭm băl, vang adrin tŏk hlôi tơ drong mơ mat tat đơ̆ng jĭ hơ buh”. ‘Nâu jĭ tơ drong jang ‘moi kĭ nơ̆r krao hơ vơn đơ̆ng Thủ tướng tĕh đak lơ̆m tơ drong vang tơ gop kơ sư̆k, tơ ƀôh jơ hngâm đon ‘mêm băl, tơ gŭm băl đơ̆ng druh dăm công nhân păng dôm unh hnam oei tơ ƀâp mơ mat tat yoa đơ̆ng jĭ COVID-19.

Tơ drong jang đei tơ lĕch đơ̆ng ‘năr 15/7/2021 truh ‘năr 30/6/2022. Mă hơ dăh, mưh răt dôm tơ mam yoa kăl kiơ̆ App răt tơ mam MEGA1 dăh mă kiơ̆ dôm anih tĕch tơ mam đơ̆ng tơ drong jang âu, druh dăm công nhân, kon pơ lei gô đei dôm anih tĕch mơ dro vang jang kiơ̆ tơ drong jang, tơ jur kơ jă truh 50% kơ jă tơ mam drăm.

Dang ei tơ drong jang âu đei tơ drong tơ gŭm, yak hơ doi đơ̆ng lơ anih tĕch mơ dro lơ̆m tĕh đak. Ƀok Nguyễn Ảnh Nhượng Tống – Kơ dră Khul vei lăng Công ty jang hơ doi Grŭp jang Yeah1, anih pơ gơ̆r jang ăn tơ băt, dang ei, tơ drong jang oei pơ truh lơ tơ mam yoa kăl đei bơ̆n phe, đak tŏh, đak măm, đak tương, đak kho,… ‘Ngoăih kơ ‘nŏh vang tơ gŭm kŭm hăm dôm khul grŭp, anih tĕch mơ dro, dôm bơ ngai ‘mĕh pơ gơ̆r tơ drong jang chă tơ gŭm ăn kon pơ lei đei tơ drong arih xa mơ mat tat yoa đơ̆ng jĭ COVID-19. Công ty jang hơ doi Grŭp jang Yeah1 oei bơ̆ jang tơ păt hăm dôm anih pơm tơ lĕch tơ mam, răt iŏk tơ mam hăm kơ jă tĕch kơ tă tơ̆ hnam kơ măy, đơ̆ng nŏh vă tơ jur kơ jă ăn kon pơ lei răt:

“Nhôn chih hơ met bơ̆n combo pơm thoi yơ vă bơ ngai răt 1 khei lăp kla đơ̆ng 100 -200 rơ bâu gơ̆h măh mai tơ mam yoa lơ̆m khei bơih, nhôn kŭm roi tơ băt dôm tơ drong tam ‘lơ̆ng vă kon pơ lei răt 1 combo 1 khei. Dang ei tơ drong pơm tơ lĕch tơ mam khei ‘nâu pơ truh tam truh 50 rơ bâu combo, khei đơ̆ng rŏng vă pơ hnŏng hơ tŏk truh 200 rơ bâu combo, roi đunh roi tŏk”.

‘Nhŏng Ngô Văn Cương, Bí thư Trung ương Đoàn pơ ma lơ̆m jơ tơ lĕch tơ drong jang

Ƀok Nguyễn Ngọc Dũng, Phŏ kơ dră vei lăng Khul tĕch mơ dro hăm điên tư Việt Nam ăn tơ băt: Khul vă yak hơ doi hăm tơ drong jang kiơ̆ đơ̆ng akŏm dôm anih tĕch mơ dro điên tư tih lơ̆m tĕh đak păng dôm anih tĕch mơ dro chơ chuĕn tơ mam vă tơ gŭm chuĕn tơ mam truh hăm bơ ngai răt:

“’Ngoăih kơ tơ drong Khul tĕch mơ dro hăm điên tư tơ gŭm ăn tơ drong jang hơ nhăk tơ mam truh hăm bơ ngai răt yoa hrĕnh hlŏh, hrei ‘nâu anih pơ gơ̆r oei akŏm đĭ đăng ‘nhŏng ŏh pơm thoi yơ vă hơ nhăk ba ăn anih hơ len năng tơ drong ‘lơ̆ng lăng năng tơ mam ‘nŏh ‘lơ̆ng ưh, chih hơ dăh kơ jă vă chơ tĕch ăn rim bơ ngai, ưh ăn đei tơ mam ưh ‘lơ̆ng dăh mă lê̆ kon pơ lei akhan, hơ tŏk kơ jă pơ klĕm đang kơ ‘nŏh tơ jur kơ jă tĕch”.

Tơ lĕch tơ̆ 63 dêh char, plt lơ̆m tĕh đak, mă lei tơ drong jang pơ ‘nhŏ hơ drol tơ̆ dôm dêh char, plt oei đei jĭ COVID-19 tơ pŏh krê hơ mơt. Mă hơ dăh, lơ̆m dôm khei 7, 8, 9, tơ drong jang pơ truh ăn plt Hồ Chí Minh, Bình Dương păng dôm dêh char jŭm dăr. Tơ drong ‘nâu gô đei pơih xă lơ̆m dôm khei đơ̆ng rŏng dơ̆ng lăng kiơ̆ rim tơ drong đei tơ̆ yăn âu.

Adrol kơ ‘nŏh, vă tơ gŭm ăn kon pơ lei jang chŭn mir tĕch mơ dro tơ mam jang đei, lăng kiơ̆ tơ drong jĭ Covid-19, Trung ương Đoàn Thanh niên Cộng sản Hồ Chí Minh hlôi pơ gơ̆r tơ drong jang “Pơ truh tơ mam đơ̆ng choh jang xa – Klăih song tơ drong ‘mêm băl – Vang adrin tŏk hlôi kơ tơ drong jĭ hơ buh”. Dôm anih tĕch mơ dro, anih jang pơ kăp vei sơ đơ̆ng tơ drong arih xa tơ pôl, tơ gŭm ăn bơ ngai jang tŏk klăih đơ̆ng mơ mat tat yoa jĭ COVID-19, atŭm hăm ‘nŏh tơ lĕch jang ‘lơ̆ng tơ drong krao hơ vơn “Bơ ngai Việt Nam tơ gŭm răt iŏk tơ mam Việt Nam”.

Kiơ̆ Bí thư mă 1 Trung ương Đoàn TNCS Hồ Chí Minh Nguyễn Anh Tuấn, hăm tơ drong pơ truh tơ mam đơ̆ng choh jang xa tơ̆ dôm anih tĕch mơ dro hăm điên tư hai, tĕch mơ dro tơ păt tơ̆ ‘ngoăih hai, Khul druh dăm jang hơ doi hăm dôm Anih tơm, dôm khul grŭp jang chinh trĭ, tơ pôl iŏk yoa tơ drong pran ‘lơ̆ng đơ̆ng kơ măy kơ mŏk ‘nao vă tĕch mơ dro tơ mam đơ̆ng choh jang xa ƀônh hlot hlŏh ăn kon pơ lei lơ̆m khei ‘năr đei jĭ:

“Nhôn hơ pơi ‘mĕh jơ hngâm đon rơ gei đơ̆ng trong jang tơ gŭm âu hơ nơ̆ng đei tưk tơ iung tơ̆ hơ năp kơnh, ưh lăp hăm tơ mam choh jang xa, vang tơ gŭm băl, adrin tŏk hlôi mơ mat tat đơ̆ng jĭ hơ buh đĕch mă oei vang tơ gop kŭm hăm Anih tơm vei lăng choh jang xa păng atŏk tơ iung tơ ring tơ rang bơ̆ jang đei jơ nei tơ drong jang tơ plih ming kơ sô̆ păng atŏk tơ iung choh jang xa lơ̆m chăl ‘nao”.

Hăm hơ năp jang vang hiŏng tơ gŭm tơ drong mơ mat tat hăm kơ triu unh hnam Việt kiơ̆ đơ̆ng tơ jur kơ jă tơ mam yoa kăl, tơ drong jang oei tơ gop bơ̆ jang kiơ̆ “ƀar tơ drong jang tơm” tang găn ‘lơ̆ng jĭ hai, vei kơ jăp, tưk tơ iung tơ drong jang xa, tĕch mơ dro hai, kiơ̆ đơ̆ng tơ gŭm ăn kơ triu ‘nu bơ ngai jang, công nhân tơ̆ dôm hnam kơ măy, anih pơm tơ mam yoa kăl vei kơ jăp tơ drong jang xa, găn ƀiơ̆ tơ drong krê hiong tơ drong jang yoa đơ̆ng jĭ COVID-19, xă ƀiơ̆ kơ ‘nŏh dơ̆ng ‘nŏh vang tơ gop tưk tơ iung anih jang mŭk drăm, tĕch mơ dro xa.

Dơ̆ng: Tơ blơ̆