VOV4.Bahnar - Pơ gê hei (23/10) tơ̆ Hà Nội pơ gơ̆r hop akŏm trực tuyến “Vang tơ roi, tơ klep hơ dai mơ dro sa tơ mam drăm đơ̆ng choh jang sa, ‘long, ka hơ dang đơ̆ng Hà Nội păng rim dêh char, pơ lei tơm”. Hop akŏm ‘noh jĭ ‘măng hop akŏm mă 8 yua đơ̆ng Grŭp vei lăng Hop akŏm tơ klep hơ dai tĕch mơ dro tơ mam drăm đơ̆ng choh jang sa 970 găh Anih pơ gơ̆r jang hơ tŏk tơ iung anih tĕch mơ dro tơ mam drăm đơ̆ng choh jang sa, Anih tơm vei lăng găh choh jang sa păng hơ tŏk tơ iung tơ ring tơ rang pơ gơ̆r. Tơ̆ hop akŏm, rim bơ ngai tang măt gô tơ roi găh tơ gŭm rim tơ ring, anih jang mơ dro sa, hơp tak xăh, kon pơ lei jang chŭn mir tơ klep hơ dai pơm tơ lĕch, tĕch mơ dro tơ mam drăm đơ̆ng choh jang sa tơ̆ anih tĕch mơ dro lơ̆m teh đak păng tĕch ăn teh đak đe, pơ trŭt hơ tŏk tơ iung rim trong jang hơ dai tơ mam drăm đơ̆ng chŏh jang sa kơ jăp, hơ tŏk kơ jă tơ mam drăm păng iŏk yua ăn kon pơ lei jang chŭn mir. ‘Nâu oei jing ‘măng pơ trŭt mơ dro sa tơ mam drăm đơ̆ng choh jang sa đei đơ̆ng Hà Nội hăm rim tơ ring, hơ dai hăm ‘noh tơ klep hơ dai bơ ngai jang choh jang sa, bri ‘long, ka hơ dang đơ̆ng rim tơ ring păng anih tĕch mơ dro Hà Nội. Tơ lĕch jang đơ̆ng khei 9 truh dang ei, Hop akŏm tơ klep hơ dai tơ mam drăm đơ̆ng choh jang sa 970 hlôi pơ gơ̆r đei 7 ‘măng, nhen: tĕch mơ dro tơ mam drăm đơ̆ng choh jang sa hơ drih ăn pơ lei tơm Hồ Chí Minh lơ̆m tơ drong ưh kơ ăn yak vih vơ̆t lơ; tĕch tơ mam đơ̆ng choh jang sa ăn tơ ring Tây Nguyên; tĕch tơ mam đơ̆ng choh jang sa ăn dêh char Bình Dương, tĕch tơ mam đơ̆ng choh jang sa dêh char Đồng Tháp…Đơ̆ng dôm hop akŏm âu hlôi đei kơ hrĕng hla ar chih măt vang tĕch - răt đei kĭ pơ kăp, yak blŭng pơ jing dôm jĭt tơ drong jang hơ dai pơm tơ lĕch, tĕch mơ dro tơ mam drăm đơ̆ng choh jang sa kơ jăp ‘lơ̆ng.

Thuem: Tơ blơ̆