VOV4.Bahnar - Kiơ̆ tơ drong jang ‘măng hop akŏm, năr ‘nâu, Kuôk hô̆i hơ nơ̆ng ‘măng apĭnh jet păng tơl nơ̆r apĭnh jet hăm Kơ dră Anih tơm tơ lĕch nơ̆r sơ kơ̆t păng tơ mơ̆t jên jang; Thủ tướng Teh đak Phạm Minh Chính kŭm gô pơm hơ dăh dôm tơ drong ƀơm truh păng tơl nơ̆r apĭnh jet đơ̆ng bơ ngai tang măt Kuôk hô̆i. Lơ̆m kơ sơ̆ ‘năr 11/11, Kơ dră Kuôk hô̆i kŭm hlôi pơ gơ̆r vei lăng apĭnh jet grŭp tơ drong mă 4 găh tơ drong tơ lĕch vă jang păng tơ mơ̆t jên jang . Lơ tơ drong tơ tŏ hlôi đei bơ ngai tang măt tơ lĕch ăn hăm Kơ dră Anih tơm tơ lĕch nơ̆r sơ kơ̆t păng tơ mơ̆t jên jang Nguyễn Chí Dũng, nhen: Trong jang tơ iung ming păng hơ tŏk tơ iung mŭk drăm lơ̆m tơ drong ‘nao; tơ gŭm, hơ met pơ ‘lơ̆ng mơ mat tat ăn anih jang mơ dro sa vă tơ iung ming, hơ tŏk tơ iung pơm tơ lĕch, tĕch mơ dro; Trong jang tŭn hrĕnh tơ lĕch jên tơ mơ̆t jang kơ teh đak, mă loi ‘noh jĭ rim tơ drong jang tơm kơ teh đak. Tơl nơ̆r apĭnh đơ̆ng bơ ngai tang măt, Kơ dră tơm Nguyễn Chí Dũng hơ len lăng, tơ drong hiơ̆ kơ tơ lĕch jên tơ mơ̆t jang kơ teh đak ‘noh jĭ yua đơ̆ng tơ drong tơ lĕch tơ drong jang tơ mơ̆t jên jang tơ̆ tơ ring. Găh trong jang tơ iung ming păng hơ tŏk tơ iung mŭk drăm lơ̆m tơ drong ‘nao, Kơ dră tơm Nguyễn Chí Dũng hơ len lăng, tơ drong pơ trŭt mŭk drăm lơ̆m sơ năm 2009 hlôi iŏk đei jơ nei tơ gŭm tơ iung ming mŭk drăm jăl jang đơ̆ng rŏng ‘noh, mă lei kŭm hlôi ăn ƀôh tơ drong hlôh vao vă pơ jing jên tơ gŭm tơ iung ming mŭk drăm đei tơ lĕch jang ‘lơ̆ng hloh lơ̆m jăl jang truh.

 Thuem: Tơ blơ̆