VOV4.Bahnar - Lơ anih jang mơ dro sa tơ mang lăng tơ̆ Đà Lạt – Lâm Đồng tŏk bŏk tơ tok kơ mơ mat yua tam mă tôm tơ drong hiôk gơh pơ̆ih ‘măng sơng tơ moi. Tơ drong tơm găh lơ yua ssơ̆ng bơ ngia jang  lơ̆m anih jang tă kơ tam mă ƀet tôm 2 jrŭm vắc xin kiơ̆ tơ drong hơ găt.

Đơ̆ng năr apŭng plĕnh teh tơ lĕch tơ drong tơ chơ̆t 128 găh “ hơ găt pơ gia oei sa sơ đơ̆ng‘lơ̆ng, tơ tĕnh, vei lăng đei yua jĭ Covid-19”, dêh char Lâm Đồng tŭn pran tơ drong tơ iung ming pơm tơ lĕch, tĕch mơ dro lơ̆m tơ drong hmă ‘nao, ƀok Lê Hồng Thanh, Kơ dră vei lăng 1 anih chă ăn tơ moi tơ mang lăng ƀĭch pơ dơh tơ̆ anih kơ drơ̆m Đà Lạt tôch kơ chhôk hơ iă. Yua kơ đơ̆ng rŏng 1 puăt sơ năm hnam hôtel tang ‘măng yua kơ jĭ Covid-19, dang ei hlôi đei tơ drong hiôk vă bơ̆ jang hơ lơ̆k dơ̆ng. Mă lei, dang ei hnam hôtel sư oei ưh kơ gơh pơ̆ih ‘măng yua kơ dôm bơ ngai jang tam mă ƀet tôm 2 jrŭm vắc xin kiơ̆ tơ drong hơ găt. Ƀok Thanh sơ ‘ngon tơ roi:

 “Đơ̆ng khei 6/2021 truh dang ei anih chă ăn tơ moi ƀĭch pơ dơh roi pơ dơh kơ pơ̆ih ‘măng ‘mơ̆i, mă đơ̆ng hlôi ăn pơ̆ih ‘măng  dơ̆ng bơ̆ih ră, mă lei ưh kơ gơh sơng tơ moi yua kơ tơ drong hơ găt mă Anih tơm vei lăng găh jang pơ gang tơ lĕch ăn ‘noh jĭ athei ƀet 2 jrŭm vắc xin hăm bơ ngai pơ vih pơ văn tơ mang lăng, ƀơ̆t mă hnam hôtel nhôn lăp ‘nao đei ƀet 1 jrŭm đĕch. Kiơ̆ tơ drong hơ găt, tơ dăh ƀet jrŭm 2 ‘noh athei hiong 6 giĕng, vă khan truh hơ tuch khei 11 ‘mơ̆i mă gơh ƀet. Păng tơ dăh tơ mơ̆t yua tơ drong hơgăt thim 14 năr dơ̆ng, vă khan truh tŏk bŏk khei 12, hơ dai hăm jing đĭ sơ năm ‘mơ̆i sơng tơ moi. ‘Noh jĭ ưh kơ ‘lơ̆ng tih ăn anih jang tơ mang lăng Đà Lạt”.

Anih kơ drơ̆m pơ lei tơm Đà Lạt,anih đei tơ mam ‘lơ̆ng pran găh hơ tŏk tơ iung tơ mang lăng lơ̆m tơ drong hiôk hmă ‘nao

Kiơ̆ kơ ƀok Nguyễn Viết Vân, Kơ dră Chĕp kơ̆l Anih vei lăng găh joh ayŏ, tơ plŏng kơ dâu păng tơ mang lăng dêh char Lâm Đồng, đĭ đăng anih jang tơ mang lăng đei dôm jĭt rơ bâu ‘nu bơ ngai jang, hơ drô̆ hnam hôtel, anih ăn tơ moi chă ƀĭch pơ dơh đei truh hloh 18.500 ‘nu bơ ngai jang đei ‘mĕh vă ƀet vắc xin. Mă đơ̆ng dêh char Lâm Đồng hlôi hơ drin klăih song tơ gŭm hơ drol bơ ngai ƀet vắc xin ăn anih jang tơ mang lăng, 1 lơ̆m dôm tơ drong jang mŭk drăm tơm kơ dêh char, mă lei truh dang ei kŭm ‘nao lăp ƀet đei jrŭm 1 đĕch. Yua thoi noh, dang ei oei tam mă tôm tơ drong vă bơ̆ jang, pơ vih pơ văn ăn tơ moi. Tơ drong ‘nâu nhôn hlôi apĭnh Anih vei lăng kon pơ lei dêh char Lâm Đồng vă chă trong hơ met pơ ‘lơ̆ng.

“Nhôn hlôi năm hơ len lăng vă đĭ đăng rim anih ăn tơ moi chă ƀĭch pơ dơ̆h, anih tơ mang lăng păng tôch kơ tơ gŭm hăm rim anih jang tơ mang lăng lơ̆m khei ‘năr âu ki. Mă loi ‘noh jĭ tơ̆ Đà Lạt, ƀơ̆t mă jên thu đơ̆ng pơ vih pơ văn tơ mang lăng đei truh 79% mă lei hlôi tang ‘măng vă jê̆ pơ đĭ sơ năm ‘nâu. Hăm ƀet vắc xin, dang ei hăm khŭl jang tơ mang lăng đơ̆ng Đà Lạt ding truh tơ̆ Cát Tiên tă kơ hlôi đei ƀet ră mă lei lăp hăm 1 jrŭm đĕch. Ĭnh hlôi apĭnh hăm Anih pơ gơ̆r jang kŭm nhen Anih vei lăng kon pơ lei dêh char gô tơ gŭm hơ drol hrôih hloh ăn anih jang tơ mang lăng vă đei tôm tơ drong hiôk, hơ met pơ ‘lơ̆ng mơ mat tat, tơ hlăk tơ hlĭn ăn đĭ đăng rim anih jang tơ mang lăng tơ̆ hơ năp kơnh.”

Mă lei vă đĭ đăng rim anih ăn tơ moi chă ƀĭch pơ dơh tơ̆ Đà Lạt tă kơ tam mă tôm tơ drong hiôk vă pơ̆ih ‘măng sơng tơ moi tơ mang lăng ‘ngoăih dêh char

Kŭm hăm hơ drin hơ met pơ ‘lơ̆ng tơ drong ƀet tôm 2 jrŭm vắc xin, vei sơ đơ̆ng tơ drong hiôk vă pơ vih pơ văn ăn tơ moi tơ mang lăng, anih jang tơ mang lăng dêh char Lâm Đồng kŭm tŏk bŏk pơ trŭt jang pơ keh tơ drong hơ găt sơ đơ̆ng lơ̆m tang găn jĭ hăm tơ drong jang tơ mang lăng kơ tơ ring. Đei thoi noh, Đà Lạt - Lâm Đồng mă jing anih năm truh sơ đơ̆ng kơ tơ moi tơ mang lăng lơ̆m tơ drong hiôk sơ đơ̆ng hmă ‘nao.

            Quang Sáng: Chih

            Thuem: Tơ blơ̆