VOV4.Bahnar - Lơ̆m jơ hôp roi tơ băt găh tơ drong vă jang lơ̆m Hop akŏm mă 1, Kuô̆k hô̆i jăl XV, Tổng Thư ký Kuô̆k hô̆i Bùi Văn Cường ăn tơ băt: Tơ drong jĭ Covid-19 oei tơ pŏh tôch hơ mơt tơ̆ lơ tơ ring, mă lei, kiơ̆ luơ̆t hơ găt hiơ̆ hlŏh ‘nŏh 60 năr đơ̆ng rŏng kơ pôk rơih athei pơ gơ̆r Hop akŏm mă 1 kơ Kuô̆k hô̆i jăl ‘nao.

Tổng Thư ký Kuô̆k hôi Bùi Văn Cường pơ gơ̆r hôp roi tơ băt

Tơ drong tơm lơ̆m hop akŏm mă âu ‘nŏh hơ met pơ kĕh bơ ngai jang tih kơ tĕh đak kơ na dôm bơ ngai tang măt vă akŏm pơ ma nuh, tăh kơ phĭu srĕp. Hop akŏm vă pơ gơ̆r ‘năr 20/7/2021 tơ̆ Hnam Kuô̆k hô̆i păng pơ tôch lơ̆m ‘năr 31/7/2021, tơ jur ƀiơ̆ 5 năr pơ têng hăm năr tơ lĕch hơ drol. Hop akŏm ‘măng mă âu tôch gĭt kăl, pơih trong ăn tơ drong jang kơ Kuô̆k hô̆i jăl XV, lơ̆m nŏh đei tơ drong Kuô̆k hô̆i vă pôk rơih, kĭ pơ kăp ăn dôm kơ chư̆k jang tih kơ tĕh đak; set hơ len, pơ ma nuh găh tơ drong jang mŭk drăm, tơ pôl păng tơ chơ̆t 1,2 tơ drong gĭt kăl nai.

Dơ̆ng: Tơ blơ̆