VOV4.Bahnar - Pơ gê hei (18/6) tơ̆ Hà Nội, Anih tơm vei lăng choh jang xa păng atŏk tơ iung tơ ring tơ rang păng Anih tơm vei lăng tơ drong tơ roi tơ băt vang pơ gơ̆r hop akŏm trư̆k tuyê̆n lơ̆m tĕh đak găh “Tơ plih jing kơ sô̆ lơ̆m tơ drong choh jang xa păng atŏk tơ iung tơ ring tơ rang”.

Kiơ̆ tơ drong tơ chơ̆t đơ̆ng Thủ tướng tĕh đak găh tơ drong tơ plih jing kơ sô̆ lơ̆m tĕh đak truh sơ năm 2025, trong vă jang truh sơ năm 2030, tơ plih jing kơ sô̆ lơ̆m tơ drong choh jang xa vă pơ jing anih jang kiơ̆ kơ sô̆ lơ̆m tơ dỏng choh jang, pơih tơ drong ‘lơ̆ng, tưk tơ iung trong tơ plih ming kơ sô̆ đơ̆ng “Choh jang xa” jing “Jang mŭk drăm đơ̆ng choh jang xa”; hơ tŏk tơ drong choh jang xa hăm kơ măy kơ mŏk ‘nao kiơ̆ trong năng kăl tơ drong choh jang xa rơ gei, chŏh jang xa trŏ ƀlep, hơ tŏk tơ drong choh jang xa hăm kơ măy kơ mŏk kơ sô̆ lơ̆m tơ drong jang mŭk drăm.

Kiơ̆ tơ drong jang tơ plih kơ sô̆ tĕh đak đơ̆ng Việt Nam, choh jang xa đei năng jĭ 1 lơ̆m 8 tơ drong kăl đei tơ plih ming kơ sô̆. Vă tơ drong jang tơ plih jing kơ sô̆ găh choh jang xa gơ̆h đei jơ nei ‘nŏh athei jang kiơ̆ kơ măy kơ mŏk ‘nao đơ̆ng choh jang xa, pơm tơ lĕch, ‘măn răk, chơ chuĕn truh tĕch mơ dro.

Dơ̆ng: Tơ blơ̆