VOV4.Bahnar - ‘Năr 29/6, Thủ tướng Phạm Minh Chính pơ gơ̆r Hop akŏm Khul kơ dră tĕh đak găh tơ drong chih pơ jing luơ̆t khei 6/2021, kiơ̆ kơ ‘nŏh ‘măn 1 năr vă hơ len năng tơ drong chih pơ jing păng bơ̆ jang kiơ̆ luơ̆t vă jăh hơ met pơ ‘lơ̆ng dôm tơ drong mơ mat tat, tơ hlăk tăk găh trong jang, tơ drong tơ gŭm, pơ vih ăn kon pơ lei păng anih tĕch mơ dro ‘lơ̆ng ƀiơ̆. ‘Nâu jĭ 1 lơ̆m dôm tơ drong jang tơm đơ̆ng Khul kơ dră tĕh đak.

Tơ̆ hop akŏm dôm bơ ngai tang măt pơ ma nuh, drơ̆ng nơ̆r ăn 8 tơ drong: đei chih tơ lĕch Luơ̆t kanh sat cơ động; Luơ̆t hơ met ming, chih tơ mât dơ̆ng Phŭ lŭk – Hơ năn tơ drong hơ găt chih jô̆ tĕh đak đơ̆ng Luơ̆t chih jô̆; luơ̆t hơ met ming, chih tơ mât dơ̆ng 1,2 tơ drong lơ̆m Luơ̆t vei lăng đon pơ chĕh rơ gei; trong vă hơ met ming Luơ̆t tĕh; tơ drong tơ chơ̆t tơ plih ăn tơ drong Hơ găt 101 sơ năm 2005 đơ̆ng Khul kơ dră tĕh đak găh man, hơ met ming hnam chung cư; hơ met pơ ‘lơ̆ng mơ mat tat ăn tơ drong hơ găt chô̆ camera; hơ len năng tơ drong chih tơ lĕch trong jang, chih pơ jing luơ̆t 6 khei blŭng sơ năm păng trong jang, tơ drong vă jang lơ̆m dôm khei hơ tuch sơ năm.

Mĭnh tơ drong tôch kăl kơ tơ rĕk lơ̆m hop akŏm ‘nŏh jĭ tơ drong tơ chơ̆t đơ̆ng Khul kơ dră tĕh đak găh trong tơ gŭm ăn bơ ngai jang, bơ ngai iŏk đe jang păng dôm bơ ngai tơ ƀâp mơ mat tat yoa đơ̆ng jĭ COVID-19 hăm kơ sô̆ jên dang 26.000 ti. Găh tơ drong ‘nâu, Thủ tướng Phạm Minh Chính athei tơ chĕng hơ len vă pơm ‘lơ̆ng tơ drong tơ gŭm gơ̆h truh hăm dôm bơ ngai kăl đei tơ gŭm, lơ̆m nŏh chih tơ mât dơ̆ng dôm bơ ngai kăl tơ gŭm ‘nŏh jĭ bơ ngai chă jang ăn kơ đe.

Dơ̆ng: Tơ blơ̆