VOV4.Bahnar - Văn Lem jĭ xăh mơ mat tat dêh hlŏh, lơ̆m xăh đei vă jê̆ 2.900 ‘nu bơ ngai, kon pơ lei kon kông đei vă truh 98%. Bơ̆ jang kiơ̆ trong et pơm pô̆ ƀăn, ‘nhŏng ŏh kiơ̆ tơ drong tơ chơ̆t 04 đơ̆ng Anih jang đảng dêh char Kon Tum, 5 sơ năm âu ki, kŭm hăm tơ gŭm ăn xăh pơm pô̆ ƀăn vei lăng păng atŏk tơ iung bri, Anih mong jên vei lăng păng atŏk tơ iung bri dêh char Kon Tum oei jang hơ doi kơ jăp hăm anih jang đảng, khul kơ dră tơ ring păng dôm khul grŭp tơ pôl lơ̆m xăh pơ jing đei tơ drong tơ plih ‘lơ̆ng hơ iă găh jang mŭk drăm tơ pô̆l, vei lăng sơ đơ̆ng păng pơm hơ tŏk tơ drong arih xa ăn kon pơ lei.

Klo kăn ‘nhŏng A Vinh păng mŏ Y Vân tơ̆ plei Đăk Xanh, xăh Văn Lem, apŭng Đăk Tô đei truh 8 ‘nu kon. Yoa kon lơ, tơ drong arih xa pôm gơ nơm đơ̆ng pơ gar ƀum, ƀa kơ na pơ ngot hơ nơ̆ng hơ nong prăt sơ năm. Sơ năm 2018, jĭ 1 lơ̆m 5 unh hnam đei Anih mong jên vei lăng păng atŏk tơ iung bri dêh char Kon Tum rơih vă pơ jing trong  jang “Tơ gŭm, pơ tho ăn unh hnam rong nhŭng bronh” vă jang xa. Đei Anih mong jên tơ gŭm 2 tŏ nhŭng yŏng, 1 pôm nhŭng bŏng kŭm hăm ki thuŏt vei rong, jên răt tơ mam pơm hơ drong, tơ mam hiĕm blŭng a, truh dang ei nhŭng hnam ‘nhŏng A Vinh rong 1 bruh hơ nơ̆ng đei hlŏh 10 tŏ. Dang ei iŏk yoa đơ̆ng nhŭng ‘nŏh jĭ tơ drong iŏk yoa tơm, tôch gĭt kăl vă pơ ‘nhŏ ăn tơ drong arih xa lơ̆m unh hnam.

Tơ gĕch ƀât oei hiĕm ‘nhŭng, ‘nhŏng A Vinh chơt hơ iă tơ roi găh tơ drong rong nhŭng đơ̆ng unh hnam ‘nhŏng: “Adrol sơ̆ tam đei lư̆i ‘nŏh kŏh pơ le var jŭm dăr. Blŭng a hăp xa hloi bơ̆n ƀum ƀlang rơ̆ hăm ƀum chrâu, hiĕm hăp hrâm hăm đơ̆k. Đunh đunh rôp tĕch iŏk jên răt bơ̆n ƀoh, ngok thoi noh đĕch lah”.

Đơ̆ng đei Anih mong jên vei lăng păng atŏk tơ iung bri dêh char Kon Tum tơ lĕch trong jang tơ̆ xăh Văn Lem, nhen: “Hŏk pơ hrăm păng jang kiơ̆ Jơ hngâm đon ‘lơ̆ng đơ̆ng Ƀok Hô”; “Tơ gŭm, pơ tho ăn unh hnam rong nhŭng bronh”; “Pơ tho, tơ gŭm ki thuơ̆t pơ tăm, vei rong ‘long chĕh phe”... hlôi tơ gŭm ăn kon pơ lei lơ̆m xăh tơ plih đei đon tơ chĕng, trong jang xa vă jang tŏk klăih đơ̆ng tơ nuh hin. Truh dang ei dôm trong jang yoa đơ̆ng Anih mong jên tơ lĕch hlôi đei jang kiơ̆ tơ̆ đĭ đăng pơ lei, đei lơ unh hnam hŏk pơ hrăm, jang kiơ̆. Lơ unh hnam adrol sơ̆ đei năng jĭ unh hnam tơ nuh hin “hơ nơ̆ng hơ nong”, hrei ‘nâu hlôi đei iŏk yoa sơ đơ̆ng, tŏk klăih đơ̆ng tơ nuh hin bơih.

Ƀok A Hùng, Kơ dră vei lăng kon pơ lei xăh Văn Lem ăn tơ băt: “Khei ‘năr âu ki Anih mong jên vei lăng păng atŏk tơ iung bri jang hơ doi kơ jăp hăm khul kơ dră pơ gơ̆r tơ ring lơ̆m tơ drong vei lăng bri, kŭm nhen tơ rĕk, tơ gŭm ăn kon pơ lei lơ̆m xăh Văn Lem găh tơ drong jang atŏk tơ iung mŭk drăm, tơ pôl. Anih mong jên vei lăng păng atŏk tơ iung bri tơ gŭm ăn kon pơ lei jang sut pơ đĭ pơ ngot, tơ jur tơ nuh hin kŭm nhen vei lăng sơ đơ̆ng tơ drong arih xa kơ kon pơ lei. Anih mong jên vei lăng păng atŏk tơ iung bri dêh char Kon Tum tơ gŭm ăn tơ ring bơ̆ jang sut pơ đĭ pơ ngot, tơ jur tơ nuh hin kŭm nhen vei lăng sơ đơ̆ng tơ drong arih xa tơ pôl”.

Kơ sô̆ chih jô̆ đơ̆ng Anih mong jên vei lăng păng atŏk tơ iung bri dêh char Kon Tum ăn ƀôh, lơ̆m 5 sơ năm pơm pô̆ ƀăn, ‘nhŏng ŏh, bơ̆ jang tơ iung pơ jing xăh mơ mat tat dêh hlŏh Văn Lem, Anih mong jên hlôi jang ‘lơ̆ng tơ drong vei sơ đơ̆ng tơ drong arih xa tơ pôl hăm kơ sô̆ jên tơ gŭm truh kơ hrĕng triu. Hơ iă hlŏh jĭ dôm tơ drong jang yoa Chi ƀô̆ păng Chi đoàn Anih mong jên tơ lĕch, nhen tơ gŭm ăn bơ ngai đei kŏng, tơ gŭm ăn bơ ngai tơ nuh, đe hơ iŏh, hŏk tro đei tơ drong arih xa mơ mat tat; rim sơ năm tơ gŭm ăn xăh pơ gơ̆r năr pơm ƀĕng chưng... Pơ ma găh tơ drong pơm pô̆ ƀăn, ‘nhŏng ŏh, tơ iung pơ jing xăh Văn Lem đơ̆ng Anih mong jên vei lăng păng atŏk tơ iung bri dêh char Kon Tum, ƀok Lê Trọng Thọ, Bí thư Đảng xăh ăn tơ băt:

“Anih mong jên vei lăng păng atŏk tơ iung bri hơ nơ̆ng jang hơ doi hăm Anih jang Đảng xăh Văn Lem pơ gơ̆r, tơ lĕch lơ tơ drong jang atŏk tơ iung mŭk drăm, tơ pôl, vei sơ đơ̆ng tĕh đak kŭm nhen tơ iung pơ jing anih jang chinh trĭ tơ̆ xăh. Anih mong jên hơ nơ̆ng tơ rĕk, đơ̆ng blŭng sơ năm vang jang hơ doi hăm xăh tơ lĕch trong jang mă lăp hăm yăn âu tơ̆ tơ ring. Rim khei athei kăn ƀô̆ jur jang hơ doi vă hơ len năng dôm tơ drong hlôi đei tơ lĕch jang. Mưh bơ̆ jang, đei yă kiơ mơ mat tat, tơ hlăk tăk ‘nŏh jur tơ gŭm, hơ met pơ ‘lơ̆ng mă ưh ‘nŏh tơ roi ăn dôm anih jang kơ pal”.

Đơ̆ng rŏng 5 sơ năm pơm pô̆ ƀăn, vang yak hơ doi hăm Anih jang Đảng, khul kơ dră tơ ring păng khul grŭp tơ pôl kŭm hăm kon pơ lei xăh Văn Lem, Anih mong jên vei lăng păng atŏk tơ iung bri dêh char Kon Tum đei lơ tơ drong tơ gŭm gĭt kăl hăm tơ drong jang atŏk tơ iung atŭm kơ xăh. Đơ̆ng 1 xăh mơ mat tat dêh hlŏh, kon pơ lei kon kông đei truh 98%, truh dang ei Văn Lem hlôi tơ jur đei unh hnam tơ nuh jur pă 19,57%. Xăh kŭm jang đei 14/19 tơ  drong hơ găt găh pơ jing tơ ring tơ rang ‘nao bơih.

Dơ̆ng: Tơ blơ̆