VOV4.Bahnar - Đơ̆ng rŏng kơ Anih tơm vei lăng găh pơ tho pơ hrăm tơ băt hơ dăh điêm pơ long lĕch ‘măng khoă hŏk đĭ jăl 3 sơ năm 2021, 1,2 hnam trưng đăi hŏk pơ tơm tơ băt hơ dăh điêm gơ̆h mơ̆t hŏk. Sơ năm ‘nâu, điêm jô̆ păh lăp pơ long tôt ngiêp jăl 3 tŏk tơ̆ lơ môn. Kŭm hăm ‘noh, rim hnam trưng đăi hŏk hlôi ‘măn kơ sô̆ hơ găt lăp ăn dôm trong jang pha ra băl nhen: lăng kiơ̆ hŏk ƀă, lăng kiơ̆ điêm hơ len lăng hŏk gơ̆h, ƀai pơ long kiơ̆ hơ găt apŭng plĕnh teh... kơ na kơ sô̆ hơ găt lăng iŏk điêm pơ long tôt ngiêp jăl 3 gô tơ jur. Yua thoi noh, điêm gơ̆h mơ̆t hŏk đăi hŏk sơ năm ‘nâu đei tơ băt hơ drol gô tŏk pơ têng hăm dôm sơ năm hơ drol.  

- Yă Nguyễn Thu Thủy ăi! Sơ năm ‘nâu, lơ hnam trưng đăi hŏk hơ nơ̆ng đei lơ trong jang rơ̆ih hŏk tro mơ̆t hŏk, roi tơ băt điêm pơ long tôt ngiêp jăl 3 kŭm lơ hloh kơ sơ năm hơ drol, tơ drong ‘nâu ƀơm truh lơ liơ hăm điêm gơ̆h mơ̆t đăi hŏk?

PGS.TS Nguyễn Thu Thủy: Nhen kơ tơ̆ng ang đơ̆ng Anih tơm vei lăng găh pơ tho pơ hrăm hlôi tơ băt hơ dăh hơ drol ‘noh, điêm pơ long tôt ngiêp jăl 3 sơ năm 2021 tŏk tơ̆ lơ môn pơ long. Lơ̆m noh, kơ sô̆ ƀai pơ long đei điêm lơ kŭm tŏk dai lơ tơ̆ rim môn nhen nơ̆r Anh, Ngữ văn, Giáo dục công dân, Sinh học...

Điêm gơh set mơ̆t hŏk hăm điêm pơ long tôt ngiêp jăl 3 tơ̆ âu ‘noh jĭ điêm gơ̆h mơ̆t hŏk đơ̆ng rim hnam trưng pơ mơ̆ng lơ̆m lơ tơ drong tơm nhen điêm pơ long tôt ngiêp jăl 3 (điêm đơ̆ng dôm môn pơ long tôt ngiêp jăl 3 ‘noh điêm gơ̆h set mơ̆t hŏk đăi hŏk), hơ găt rơ̆ih hŏk tro mơ̆t hŏk, kơ sô̆ hŏk tro chih măt set mơ̆t hŏk lơ̆m 1 tơ drong jang.

Điêm jô̆ păh lăp lơ, kơ sô̆ ƀai pơ long đei 8 điêm tơ̆ kơ pal kŭm dai lơ, kơ na tơ drong set mơ̆t hŏk gô hiôk ƀiơ̆, rim hnam trưng đei hiôk lơ̆m tơ drong băt hơ dăh vei sơ đơ̆ng điêm lơ mơ̆t hŏk blŭng. ‘Ngoăih tơ drong điêm 1,2 môn pơ long lơ hloh pơ têng hăm sơ năm 2020, ‘noh tơ drong rim hnam trưng đăi hŏk hlôi kơ sô̆ hơ găt kŭm lơ ăn rim trong jang nai nhen set hok ƀă, set điêm hŏk gơ̆h, ƀai pơ long kiơ̆ apŭng plĕnh teh... kơ na kơ sô̆ ‘măn vă set điêm pơ long tôt ngiêp jăl 3 gô tơ jur lăp ai. ‘Nâu kŭm jing 1 tơ drong tơm gĭt kăl pơm ăn điêm set mơ̆t hŏk đăi hŏk sơ năm ‘nâu gô lơ ƀiơ̆ kơ dôm sơ năm hơ drol.

- Hŏk tro akhan tơ drong ƀai hơ nat - ƀônh ưh kơ hơ tŏ băl đơ̆ng dôm môn gô pơm mơ mat tat ăn hŏk tro lơ̆m tơ drong tơ plih ‘mĕh vă, ih lăng thoi yơ găh tơ drong ‘nâu?

PGS.TS Nguyễn Thu Thủy: Tơ chơ̆t rơ̆ih hŏk tro tơ lĕch dang ei ăn phep hŏk tro gơ̆h chih măt set mơ̆t hŏk ư̆h kơ kiơ̆ pơ kăp kơ sô̆ ‘mĕh vă,  rim grŭp akŏm lơ̆m 1 tơ drong jang ‘noh 1 tơ drong ‘mĕh vă bơ̆ih. Rim hnam trưng lăng kiơ̆ lơ̆m điêm đơ̆ng lơ năm tơ̆ tŏ sĕt vă set iŏk, mă ư̆h kơ lăng kiơ̆ lơ̆m tơ rih ‘mĕh vă set mơ̆t hŏk. Ưh kơ jô̆ đei hŏk tro atŭm kơ sô̆ điêm tơ̆ hơ tuch hơ năn, yua thoi noh hŏk tro gơ̆h chih măt set mơ̆t hŏk hăm lơ grŭp akŏm lơ̆m 1 tơ drong jang. Yua thoi noh rim đe oh athei rơ̆ih iŏk dôm grŭp akŏm đei môn pơ long mă kơ dih đei điêm lơ vă vang set mơ̆t hŏk đăi hŏk, kao đăng, hŏk tro đei lơ tơ drong hiôk vă tơ plih ‘mĕh vă 1 trong mă lăp, ƀlep hloh kiơ̆ lơ̆m điêm pơ long tôt ngiêp jăl 3 đơ̆ng kơ dih.

PGS.TS Nguyễn Thu Thủy, Vụ trưởng Vụ Giáo dục Đại học - Bộ GD&ĐT
-Yă ăi, sơ năm ‘nâu rim hnam trưng đăi hŏk đei lơ trong set mơ̆t hŏk hăm điêm lơ hloh pơ têng hăm dôm sơ năm hơ drol. Tơ drong ‘nâu, hăm đei ƀơm ư̆h kơ ‘lơ̆ng truh trong set mơ̆t hŏk hăm điêm pơ long tôt ngiêp jăl 3 ư̆h?

PGS.TS Nguyễn Thu Thủy: Lơ̆m tơ drong pơm tơ ‘ngla kơ dih lơ̆m rơ̆ih hŏk tro mơ̆t hŏk hrei ‘nâu hăm tơ drong roi ‘năr roi đei lơ anih pơ tho pơ hrăm tơ băt hơ dăh tơ drong pơ gơ̆r rơ̆ih hŏk tro hơ drô̆ dăh mă pơ gơ̆r pơ long kiơ̆ grŭp ‘noh kơ sô̆ pơ kăp măn ăn bơ ngai set rơ̆ih mơ̆t hŏk hăm điêm pơ long tôt ngiêp jăl 3 tơ jur pơ têng hăm dôm sơ năm hơ drol ‘noh jĭ lăp păng oei lơ̆m trong jang bơ̆n hlôi băt hơ drol.

Kiơ̆ chih jô̆ ăn ƀôh, sơ năm 2021 rim hnam trưng ‘măn pơ kăp ăn rim trong jang rơ̆ih hŏk tro mơ̆t hŏk pha lơ hloh hăm dôm sơ năm. Mă lei, set mơ̆t hŏk kiơ̆ rim trong nai pơ mơ̆ng lơ̆m lơ tơ drong tơm nhen kơ sô̆ hŏk tro chih măt set mơ̆t hŏk , tơ drong ‘lơ̆ng rơ̆ih mơ̆t hŏk blŭng, kơ sô̆ hŏk tro đâ̆u đăi hŏk băt hơ dăh mơ̆t hŏk... kơ na tơ drong rơ̆ih hŏk tro mơ̆t hŏk ‘noh jĭ 1 kơ sô̆ kăl. Hŏk tro mư̆h đĭ set mơ̆t hŏk hăm trong nai mă đĭ tôm điêm đâ̆u păng băt hơ dăh mơ̆t hŏk ‘noh gô ư̆h kơ vang set mơ̆t hŏk tơ̆ rim hnam trưng nai păng tơ̆ rim trong jang nai dơ̆ng. Rim hnam trưng gô athei chih tơ mơ̆t hơ năn dôm hŏk tro hlôi băt hơ dăh mơ̆t hŏk tơ̆ kơ măy chih răk păng rim hŏk tro âu gô ư̆h kơ vang akŏm vă set mơ̆t hŏk đơt 1 hăm điêm pơ long tôt ngiêp jăl 3 păng gô ư̆h kơ pơm ư̆h kơ ‘lơ̆ng truh kơ sô̆ rơ̆ih mơ̆t hŏk đơ̆ng trong set mơ̆t hŏk âu kiơ̆ trong lăng điêm pơ long tôt ngiêp jăl 3.

- Ih hăm đei nơ̆r pơ tho tơ tă kiơ ăn rim hŏk tro vă đei iŏk yua nhen chang gô lơ̆m pơ yan set mơ̆t hŏk đăi hŏk sơ năm ‘nâu ư̆h?

PGS.TS Nguyễn Thu Thủy: Điêm pơ long tôt ngiêp jăl 3 sơ năm ‘nâu lơ ƀiơ̆ tŏ sĕt pơ têng hăm sơ năm hơ drol, rŏ lăng 1,2 ‘nu oh đei 25, 26 điêm oei ư̆h kơ kĕ đâ̆u đăi hŏk tơ dăh ư̆h kơ hơ len mư̆h rơ̆ih ‘mĕh vă. Vă khan ‘noh jĭ hŏk tro ư̆h kơ gơ̆h pơm pơ hơi hăm điêm kơ dih iŏk đei mă luh lăh akŏm lơ̆m 1 kơ sô̆ tŏ sĕt dôm tơ drong jang pơ jei băl tôch kơ lơ đơ̆ng 1 kơ sô̆ tŏ sĕt hnam trưng. Mư̆h hơ met ming ‘mĕh vă, hŏk tro kăl lăng mă hơ len ‘nĕ kơ yua ƀôh điêm bơ̆n hơ tŏ dang điêm hơ găt đơ̆ng tơ drong jang âu sơ năm hơ drol mă chih măt mă ư̆h kơ rơ̆ih iŏk hŏk tơ drong jang nai hơ yơ sơ đơ̆ng, yua kơ điêm lơ ‘noh lơ tơ̆ atŭm, mă ư̆h kơ sĭ pha hăm 1,2 tŏ sĕt hŏk tro. Hăm đe oh lui hăm kơ sô̆ điêm lơ ‘noh athei chih tơ mơ̆t thim ‘mĕh vă, gơ̆h rơ̆ih 1,2 tơ drong jang ‘meh vă mă lei tơ̆ lơ hnam trưng pha ra băl vă hơ tŏk tơ drong hiôk đei gơ̆h mơ̆t hŏk.

- Lei ah, bơ nê kơ ih yă bà Nguyễn Thu Thủy, Kơ dră anih jang vei lăng găh pơ tho pơ hrăm Đăi hŏk - Anih tơm vei lăng tơ drong pơ tho pơ hrăm găh jơ pơ ma dơ nuh âu hơ.

Thuem: Tơ blơ̆