VOV4.Bahnar -  Khŭl jang hơ met hrĕnh găh Kŏng ti ŭnh điên Dak Nông ‘nao hơ met unh điên kơ tă tơ̆ trong tơ ley 22KV tŏk bŏk đei ŭnh điên tơ̆ Cư Jút, tơ tĕnh hŭt lê̆ dôm tơ drong hơ mơt sar bar. Mă hơ dăh ‘noh, tơ̆ jrăng C53 găh mạch kép ĐD481CJU păng ĐD477CJU, Anih jang Unh điên Cư Jút hlôi chă ƀôh hơ nih chô̆ pơ trơp đei kơ nê̆, hơ mơt kơ ƀơm ưh kơ ‘lơ̆ng truh tơ drong pơ truh unh điên ăn tơ moi păng dôm hơ nih unh điên măt ‘năr tơ̆ pơ bŭng hnam đơ̆ng rŏng jrăng.

Kŏng nhan tŏk bŏk hơ met tơ̆ jrăng C53 tơ ley unh điên 22kv Cư Jut

Iŏk đei kơ tơ̆ng ang, Khŭl jang hơ met hrĕnh hlôi tơ lĕch trong jang chô pĭt  hotline kiơ̆ hơ nih tơ ƀưh, toĕnh tơ kep tơ̆ trong tơ ley unh điên trung áp păng ep ming kơ̆l FCO. Đơ̆ng rŏng vă jê̆ 3 jơ bơ̆ jang kơ tă tơ̆ trong tơ ley unh điên tŏk bŏk đei unh điên 22kV, Khŭl jang hlôi jang đang hơ met ming, vei sơ đơ̆ng tơ mam kơ măy kơ mŏk, hơ nơ̆ng, ưh kơ pơm ƀơm ưh kơ ‘lơ̆ng truh tơ drong pơ truh unh điên kŭm nhen tơ drong pơ̆ih unh điên đơ̆ng rim hơ nih unh điên măt ‘năr tơ̆ pơ bŭng hnam lơ̆m trong tơ ley.

Thuem: Tơ blơ̆