VOV4.Bahnar – Dang ei teh đak bơ̆n oei kơƀah lơ vaccine vă vei xơđơ̆ng ăn tơdrong bơ̆ng jĭ lơ̆m tơpôl. Ƀôh tơdrong kăl ƀet vaccine bơ̆ng jĭ đơ̆ng kon pơlei noh lơ̆m mạng tơpôl đei lơ tơdrong chă hơvơn dôm anih jang răt tơmơ̆t vaccine bơ̆ng jĭ Covid-19 dăh mă ƀet bơ̆ng jĭ ăn bơngai jang... Vă tang găn ƀơm đe pơhlŭ ƀet vaccine bơ̆ng jĭ Covid-19 yăh, ưh kơ băt hơdăh tơm a hla chă, ưh đei 'lơ̆ng xơđơ̆ng, Anih tơm Y tê̆ pơtruh nơ̆r hăm kon pơlei, ưh gơh yua kơloăi vaccine ưh kơ băt tơm a hla chă. Anih tơm Y tê̆ pơtruh nơ̆r hăm dôm tơring, anih jang mŭk drăm kăl răt tơmơ̆t vaccine bơ̆ng jĭ Covid-19 kăl pơma đam kơtă hăm dôm anih pơm tơlĕch vaccine, nĕ gan kiơ̆ đơ̆ng bơngai nai tơroi. Dôm kơloăi vaccine bơ̆ng jĭ Covid-19 đei yua tơ̆ Việt Nam athei đei Anih tơm Y tê̆ axong hla bar pơkăp gơh yua lơ̆m tơdrong kăl vă tơjră pơrang jĭ. Anih tơm Y tê̆ duh xơkơ̆t: vaccine đei ƀet bơ̆ng jĭ ăn kon pơlei noh ưh đei huach jên. Yuơ noh, kon pơlei athei hơdral, gô truh tur po đei axong ƀet vaccine bơ̆ng jĭ Covid-19 ƀơ̆t anih jang y tê̆ tơroi. Atŭm hăm noh athei kơchăng hăm dôm tơdrong hơvơn chih măt ƀet vaccine bơ̆ng jĭ Covid-19 lang xă lơ̆m mạng tơpôl, kiơ̆ dôm trong tơroi tơbang phara băl.

Lan chih păng pơre nơ̆r