VOV4.Bahnar  – Kơsơ̆ năr 25/8, tơ̆ Anih jang Khul kơpal teh đak, Thủ tướng Phạm Minh Chính pơgơ̆r tơdrong hop akŏm găh tang găn păng tơjră pơrang jĭ Covid-19 păng dôm Tơchơ̆t keh đang Jơnŭm pơgơ̆r jang kơ teh đak găh tang găn păng tơjră pơrang jĭ Covid-19. Kiơ̆ tơchơ̆t 1438/QĐ-TTg, Thủ tướng Phạm Minh Chính chĕp kơ̆l Jơnŭm pơgơ̆r jang. Jơnŭm pơgơ̆r jang âu hăm dôm xơnong jang thoi âu: Pơkăp tơdrong jang, tơlĕch dôm xơnong jang, trong jang kơjăp, tơtom, đei jơnei găh tang găn păng tơjră pơrang jĭ COVID 19. Pơma ăh hop akŏm, Thủ tướng Phạm Minh Chính pơkăl rim bơngai jang lơ̆m Jơnŭm pơgơ̆r jang pơtơm hloi xơnong jang po hăm tơdrong tơnăp hloh atŭm hăm kon pơlei tơgop tang găn, hơmet klaih pơrang jĭ. Thủ tướng ră hơdăh, lơ̆m tơjră pơrang jĭ, tơdrong jang hadoi hăm dôm khul jang athei mă tơnăp, đei jơnei; rim anih jang, khul jang đei tơgŭm đơ̆ng trung ương, ưh đei pơm tơplih xơnong jang, tơdrong pơgơ̆r jang kơ tơring mă adrô̆ tơgŭm dôm tơdrong kiơ tơ̆ tơring ưh kơ kĕ jang, atŭm hăm noh hơtŏk hơlen tơdrong jang tơjră pơrang jĭ.

Lan chih păng pơre nơ̆r