VOV4.Bahnar  – Tơ̆ Hà Nội, Anih tơm Axong pơm jang Việt Nam 'nao pơm Lêh tơbăt 135 xơnăm Năr Apŭng plenh teh Pơm jang (01/5/1886 – 01/5/2021), pơtơm Khei Bơngai pơm jang. Vang truh akŏm lêh, ƀok Kơdră teh đak bơ̆n Nguyễn Xuân Phúc ră hơdăh, lơ̆m tơdrong hơtŏk tơ iung kơ kach mạng, Đảng, Teh đak păng kon pơlei bơ̆n hơnơ̆ng tơrĕk tơvei kăp gĭt truh chăl bơngai pơm jang, păng anih jang kŏng đoan.

Mă kăl noh đơ̆ng rŏng 30 xơnăm tơplih 'nao hăm bơngai pơm jang tŏk bŏk đei măt lơ̆m tôm tơdrong jang, dôm anih jang mŭk drăm, dôm khul yuk hơlâu lơ̆m tơdrong jang kiơ̆ trong 'nao kơ teh đak păng pơm kiơ̆ tơdrong hơpơi 'moih đơ̆ng kon pơlei. Ƀok Kơdră teh đak pôk bơnê kơ dôm jăl jang kŏng đoan hlôi pơm kiơ̆ tơnăp tơdrong pơgơ̆r đơ̆ng Ƀan Ƀĭ thư hơnơ̆ng adrin kơ 'nôh, gơh rơgei tơlĕch dôm tơdrong jang kăp gĭt vă jê̆ 10 xơnăm kơ âu Khei iung jang kơ bơngai jang  tơpă jing 'năr akŏm hơ iă kơ bơngai pơm jang lơ̆m jâ̆p teh đak. Kơdră teh đak hmach bơnê kơ dôm tơdrong hơbĕch đơ̆ng đe đoan viên, bơngai pơm jang lơ̆m jâ̆p teh đak kơyuơ tơdrong vơ̆ pran kơ anih jang mŭk drăm, anih jang kơ teh đak păng tơdrong hơtŏk tơ iung kơ teh đak. Atŭm hăm noh pơkăl Anih jang kŏng đoan dăh hrôih pơjing tơdrong pơm jang kơ Kŏng đoan Việt Nam pơm kiơ̆ Tơchơ̆t Hop akŏm 'măng mă 13 kơ Đảng vei xơđơ̆ng khoa hŏk hơdăh, ƀônh pơm jang.  

- Tơ̆ jơ pơm lê̆h, tang măt ăn Dơnŏ anĭh chĕp pơgơ̆r Khei iung jang găh sơđơ̆ng jang sa Trung ương,  Kơdră chĕp pơgơ̆r Dơnŏ anĭh tơm vei lăng Tơdrong jang bơngai rơka păng tơpôl  Đào Ngọc Dung tơlĕch jang Khei iung jang găh Sơđơ̆ng, rơgoh ‘lơ̆ng tơdrong jang sơnăm 2021 hăm hơnăn “Atŏk kơtang lăng hơlen, dăr lăng rim tơdrong hơmơt đei tơdrong ư̆h sơđơ̆ng lơ̆m jang păng tơdrong vang iung năm đơ̆ng dôm bơngai jang găh tơdrong sơđơ̆ng”.  Tơlĕch Khei iung jang găh sơđơ̆ng tơdrong jang sơnăm 2021, Dơnŏ anĭh tơm vei lăng Tơdrong jang Việt Nam pơrô̆ athei rim Kŏng đoàn atŏk kơtang tơroi tơbăt; tơlĕch rim tơdrong jang pơting dĭh băl păng atŏk jang iŏk đei jơnei kơ jăp lơ̆m kon pơlei bơư jang vei lăng sơđơ̆ng tơdrong jang tơklep hăm bơ̆ jang tang găn jĭ Covid-19. ‘Ngoăih kơ ‘nŏh, atŏk kơtang tơroi tơbăt bơ̆ jang ‘lơ̆ng păng jơnei kơ khŭl jang vei lăng sơđơ̆ng tơdrong jang tơ̆rim hơnĭh pơm tơlĕch; pôk hơpăh tơtom ăn khŭl jang đei trong tơchăr hơgei, trong jang kĭh thuơ̆t, hơmet pơ ‘lơ̆ng tơdrong jang hơ iă, atŏk đei jơnei iŏk yua kơ jăp păng sơđơ̆ng tơdrong jang; atŏk kơtang bơ̆ jang iung jang hơdoi lơ̆m dăr lăng hơlen tơdrong sơđơ̆ng tơdrong jang.

Lan – Zưt chih păng pơre nơ̆r