VOV4.Bahnar - Kơsơ̆ năr 10/6, tơ̆ Hnam Kuô̆k hô̆i hlôi pơgơ̆r Hop akŏm tơbăt ăn khŭl chĭh kơtơ̆ng ang găh Tơdrong tơchơ̆t đơ̆ng Jơnŭm vei lăng pôk rơ̆ih Tĕh đak găh pơtôch pôk rơ̆ih păng hơnăm dôm bơngai đei pơm Kơdră tang măt Kuô̆k hô̆i jăl XV. Kiơ̆ kơ ‘nŏh, 499 ‘nu bơngai đei pơm Kơdră tang măt Kuô̆k hô̆i jăl XV. Iung pơma tơ̆ pơgơ̆r hop akŏm tơbăt, ƀok Trần Thanh Mẫn - Kơdră jang lơ̆m Dơnŏ anĭh tơm Chĭnh trĭ, Kơ iĕng Kơdră chĕp pơgơ̆r Kuô̆k hô̆i, Kơ iĕng kơdră chĕp pơgơ̆r Jơnŭm vei lăng pôk rơ̆ih Tĕh đak pơma hơdăh, ‘măng pôk rơ̆ih lơ̆m jơ ‘năr chơt hơ iă, tơtŏ hơnơ̆ng, tơpăt, ƀlep hăm khôi luơ̆t, sơđơ̆ng, pơkom, jơnei tôch ‘lơ̆ng liĕm, tơpă jing năr lê̆h tĭh kơ pơ đĭ kon pơlei hăm 99,6% akŏp măt bơngai tăh hla năm tăh hla. Ƀok Bùi Văn Cường – Tổng Thư ký Kuô̆k hô̆i, Kơdră chĕp pơgơ̆r Hơnĭh jang Jơnŭm vei lăng pôk rơ̆ih Tĕh đak tơbăt, ‘măng pôk rơ̆ih hlôi pôk tơmơ̆t tôm kơsô̆ 500 ‘nu kơdră tang măt Kuô̆k hô̆i. Mă lei, lơ̆m jơ ‘năr lăng hơlen găh jơhngơ̆m đon tơdrong jang kơ bơngai đei pôk tơmơ̆t, Jơnŭm vei lăng Pôk rơ̆ih Tĕh đak tơ̆ Hop akŏm mă 6 tơchơ̆t ư̆h kơdrơ̆ng kiơ̆ hơhngơ̆m đon tơdrong jang bơngai tang măt kơ yuơ ư̆h kơ tôm ƀlep tơdrong ‘lơ̆ng lăp hăm tơdrong tơchơ̆t kơ 1 ‘nu bơngai, tơ̆ hơnĭh tăh hla kơ sô̆ 1 lơ̆m dêh char Bình Dương.

Tơblơ̆ nơ̆r: Amazưt