VOV4.Bahnar - Năr au, năr 10/6, Hơnĭh bơ̆ jang Kuô̆k hô̆i pơgơ̆r hop akŏm tơbăt hăm khŭl chĭh kơtơ̆ng ang, tơbăt hơdăh Tơdrong tơchơ̆t đơ̆ng Jơnŭm vei lăng Pôk rơ̆ih Tĕh đak găh hơnăn dôm bơngai đei pơm Kơdră tang măt Kuô̆k hô̆i jăl XV. Tổng thư ký Kuô̆k hô̆i, Kơdră chĕp pơgơ̆r Jơnŭm vei lăng pôk rơ̆ih Tĕh đak Bùi Văn Cường tơbăt, năr pôk rơ̆ih năr 23/5 au ki, đei hlŏh 69 trĭu ‘nu kon pơlei tăh hla lơ̆m tĕh đak vang năm tăh hla pôk rơ̆ih kơdră tang măt Kuô̆k hô̆i jăl XV păng kơdră tang măt jơnŭm vei lăng kon pơlei jăl jang 2021-2026. ‘Nau ‘măng pôk rơ̆ih pơgơ̆r tĭh hlŏh đơ̆ng sơ̆ trŭh dang ei, mă đơ̆ng đei pơgơ̆r lơ̆m khei ‘năr đei jĭ hơbuh Covid-19 tơpŏh kơtang. Măt bơngai tăh hla năm tăh hla lơ 99,60%, sơkơ̆t hơdăh jơhngơ̆m đon hlô̆h vao chĭnh trĭ, jơhngơ̆m đon ‘mêm kơ eng tĕh đak păng jơhngơ̆m đon lui kiơ̆ đơ̆ng kon pơlei hăm Đảng, Tĕh đak tôch kơtang. Pơtôch pôk rơ̆ih, bơngai tăh hla hlôi pôk rơ̆ih tôm măt bơngai tang măt Kuô̆k hô̆i kiơ̆ khôi luơ̆t tơchơ̆t; pôk tơmơ̆t đei 99,87% măt bơngai kơdră tang măt Jơnŭm vei lăng kon pơlei dêh char; 99,81% măt bơngai kơdră tang măt Jơnŭm vei lăng kon pơlei apŭng păng 98,91% măt bơngai kơdră tang măt Jơnŭm vei lăng kon pơlei tơring pơtêng hăm măt bơngai kăl vă pôk tơmơ̆t kiơ̆ khôi luơ̆t tơchơ̆t.

Tơblơ̆ nơ̆r: Amazưt