VOV4.Bahnar - Kơsơ̆ năr 7/5, tơ̆ Dơnŏ anĭh Đảng dêh char Dak Lăk, yă Trương Thị Mai, Kơdră jang lơ̆m Dơnŏ anĭh tơm Chĭnh trĭ, Bí thư T.Ư Đảng, Kơdră Dơnŏ anĭh chĕp pơgơ̆r Trung ương hlôi pơm tơm hop akŏm tơlĕch jang kiơ̆ Tơdrong tơchơ̆t đơ̆ng Dơnŏ anĭh tơm Chĭnh trĭ găh bơ̆ jang pơ prŏ kang ƀô̆.

Yă Trương Thị Mai pơjao hla bơar Tơchơt, pôk ăn pơkao hmach chơt hơ iă ăn Bí thư Đảng ‘nao dêh char Dak Lăk Nguyễn Đình Trung.

Tơ̆ hop akŏm, ƀok Nguyễn Thanh Bình, Kơdră jang lơ̆m Trung ương Đảng, Kơ iĕng kơdră Dơnŏ anĭh Chĕp pơgơ̆r Trung ương Đảng hlôi tơbăt hơdăh Tơdrong tơchơ̆t kơsô̆ 84/2021 kơ Dơnŏ anĭh tơm Chĭnh trĭ găh tơdrong pơjao tơdrong jang hăm ƀok Nguyễn Đình Trung, Kơdră jang lơ̆m Trung ương Đảng, Kơ iĕng Kơdră chĕp pơgơ̆r Đảng dêh char, Kơdră chĕp pơgơ̆r Dơnŏ anĭh vei lăng kon pơlei dêh char Dak Nông pơdơ̆h jang Kơ iĕng Kơdră chĕp pơgơ̆r Đảng dêh char, Kơdră chĕp pơgơ̆r Dơnŏ anĭh vei lăng kon pơlei dêh char Dak Nông vă vang jang lơ̆m Khŭl chĕp pơgơ̆r, Khŭl kơdră kơpal păng iŏk jang kơchư̆k Bí thu Đảng dêh char Dak Lăk jăl  jang 2020-2025.

Ƀok Nguyễn Đình Trung, Kơdră jang lơ̆m Trung Ương Đảng, Bí thư Dak Lăk iung pơma iŏk tơdrong jang

Iung pơma tơ̆ hop akŏm, yă Trương Thị Mai tơbăt, ƀok Nguyễn Đình Trung ‘nŏh kang ƀô̆ chĕp pơgơ̆r sơnăm mơlô̆h đei hŏk pơ hrăm trŭh tơ̆p trŭh troch, đei pơhrăm kiơ̆ rim tơdrong jang phara dĭh băl, hlŏh 24 sơnăm bơ̆ jang hơnơ̆ng tơ̆ rim dêh char Tây Nguyên. Kơ yuơ lơ lŏh, hăm kơchư̆k ‘nao, ƀok Nguyễn Đình Trung gô hơnơ̆ng kiơ̆ yok rok jơ̆ng hơnăp jang, tơdrong kĕ jang đơ̆ng kơ dĭh vă tơgop lơ̆m tơ iung pơjing dêh char Dak Lăk atŏk tơ iung, kơ jăp ‘lơ̆ng.

Tơblơ̆ nơ̆r: Amazưt