VOV4.Bahnar – Jing anih hơbuh pơrang jĭ mă blŭng hli hlơt hloh dêh char Đăk Lăk,  hăm  51 ‘nu F0, dang ei pơlei Ea Bhok, xăh Ea Bhok, apŭng Cư Kuin hlôi găn 25 năr ưh đei bơngai ‘nao ƀơm jĭ. Tôm F1 hlôi keh đang khei năr pơkăp oei tơklăh păng hlôi đei 44 ‘nu bơngai ƀơm jĭ lĕch đơ̆ng hnam pơgang. Tơdrong erih kon pơlei tơ̆ Ea Bhok tŏk bŏk oei vih xơđơ̆ng nhen hmă.  

Chĕp hơchô̆ hla hơƀo ăn rơmo xa đang, ƀok Y Doen Mlo, oei tơ̆ pơlei Ea Bhok, xăh Ea Bhok, apŭng Cư Kuin, dêh char Đăk Lăk hơmet năm hơlen mir ƀa. Dôm tơdrong jang âu ‘nao đei ƀok  Y Doen Mlo  vih pơm jang lơ̆m minh giĕng kơ âu. Adrol kơ noh, ăh khei 7, unh hnam ƀok đei 9 ‘nu adoi ƀơm jĭ COVID -19; đei 2 klo hơkăn ƀok Y Doen Mlo atŭm hăm 3 ‘nu kon păng 4 ‘nu xâu. Truh dang ei adrô̆ oei  hơkăn ƀok tŏk bŏk oei hơmet jĭ, 8 ‘nu nai lơ̆m unh hnam hlôi đei hơmet klaih păng duh keh đang 14 năr pơkăp oei tơklăh tơ̆ hnam đơ̆ng rŏng lĕch đơ̆ng hnam pơgang: “Vih truh tơ̆ hnam noh xô̆ xôn, jơhngơ̆m jăn adoi grăng ‘lơ̆ng. Mir na, nhŭng rơmo duh đei bơngai tơgŭm, vei rong ăn, inh chôt vih ƀôh tơnăp, ƀa na tŏk bŏk oei xrôk chôh noh inh tôch kơ hnach bơnê”

Duh nhen ƀok Y Doen Mlo, yă H’Noen Ksor jing bơngai ƀơm jĭ COVID -19 ăh năr 22/7 ƀơ̆t tơrĕk tơjê̆ hăm ‘nhŏng oh ƀơm F0 lơ̆m pơlei. 5 ‘nu nai lơ̆m unh hnam yă noh F1 păng athei pơm kiơ̆ pơkăp oei tơklăh minh ƀôt lơ̆m 21 năr. Chôt vih hăm tơdrong erih hmă đơ̆ng rŏng minh khei minh puơ̆t hơmet jĭ păng pơkăp oei tơklăh kơyuơ COVID -19, yă H’Noen Ksor băt hơdăh hloh găh kơjă kăp gĭt kơ tơdrong erih păng hlôh vao hloh găh tơdrong tang găn pơrang jĭ: “Ƀak sih tơtă vih tơ̆ hnam, ưh gơh năm tơ̆ yơ ôh oei tơ̆ hnam đĕch, ưh gơh pơma dơnuh hăm bu ôh, hăm kon xâu lơ̆m hnam duh ưh, kơdih oei tơklăh, por tơƀăng xŏng xa noh kon xâu lơ̆m hnam pai đang ‘nhăk ăn kơ inh, minh ƀar năr đơ̆ng rŏng kơ vih tơ̆ hnam duh đei đe ƀak sih truh khăm hơlen. Dang ei noh inh pran bơih, đe athei năm tơ̆ xăh bơ̆ hla bar apinh chă vih vơ̆t, năm jang mir. Dang ei pơtơm khĭn lĕch tơ̆ ‘nguaih bơ̆ hla bar, oei xơ̆ noh ưh khĭn lĕch tơ̆ yơ ôh. Dang ei inh grăng bơih. Inh hmach bơnê kơ đe ƀak sih hlôi dăp đon dăp bơnôh hơmet ming jĭ ăn kơ inh”.

Ƀok Đào Huy Cường, kơdră pơlei Ea Bhok ăn tơbăt, năr 19/7, ăh pơlei băt đei bơngai ƀơm jĭ mă blŭng lơ̆m pơlei chôt vih đơ̆ng dêh char Bình Dương, đơ̆ng rŏng 3 năr, kơsô̆ bơngai ƀơm jĭ tŏk truh 36 ‘nu, păng đơ̆ng rŏng 10 năr, lơ̆m pơlei đei truh 51 ‘nu bơngai ƀơm jĭ.  70 unh hnam ƀơm tơnap kơyuơ unh hnam đei bơngai ƀơm F0 păng F1. Vă kơchăng hơmet klaih pơrang jĭ COVID -19, lơ trong jang đei jơnŭm pơgơ̆r tơring tơlĕch nhen: pơkăp pơvei tôm pơlei Ea Bhok, pơkăp pơm kiơ̆ Tơchơ̆t 16 lơ̆m tơring. Atŭm hăm noh, tơdrong erih xa ăn kon pơlei duh đei tơgŭm tơtom, vei xơđơ̆ng ưh đei lê̆ unh hnam yơ pơngot, unh hnam ưh kơ măh xŏng xa lơ̆m khei năr pơlei oei pơm kiơ̆ pơkăp pơvei vă tơjră pơrang jĭ.

Kiơ̆ kơ ƀok Đào Huy Cường, kơdră pơlei Ea Bhok, gơnơm đei tơdrong drơ̆ng đơ̆ng kon pơlei, tơdrong pơm jang kơjăp đơ̆ng jơnŭm pơgơ̆r tơring, truh dang ei, pơlei Ea Bhok hlôi tŏk 25 năr ưh đei bơngai ƀơm jĭ ‘nao, 44 ‘nu ƀơm COVID – 19 hlôi đei hơmet klaih lĕch đơ̆ng hnam pơgang păng đĭ năr pơkăp oei tơklăh. Dôm anih pơkăp pơvei tang găn pơrang jĭ duh đei pơih, tơdrong erih kon pơlei hlôi vih xơđơ̆ng:  “Dang ei pơtơm tơdrong erih nhen adrol ki noh âu ki đei iŏk tơbang đơ̆ng Jơnŭm choh jang xa xăh găh tơdrong tơgŭm ăn kon pơlei minh ƀar kih thuơ̆t hơlen hơmet pơrang hăm ‘long pơtăm, đơ̆ng rŏng đunh khei năr ưh đei hơmet. Đei minh anih pơtho hơdăh găh rim kơloăi pơgang hơmet pơrang hăm ƀa, ka phê, tiu vă kon pơlei adrin choh jang xa , pơm jang đei yua lơ vă tang găn răm ăn kon pơlei”

Ƀok Nguyễn Văn Dũng, Kơdră Anih vei lăng kon pơlei xăh Ea Bhok, apŭng Cư Kuin, dêh char Đăk Lăk ăn tơbăt: atŭm hăm tơdrong tơgŭm ăn kon pơlei tang găn hơdrông, hơmet choh jang xa lơ̆m khei năr pơlei ƀơm pơvei, jơnŭm pơgơ̆r tơring duh hơvơn dôm anih jang ‘mêm bơnat axong tơmam xa ăn dôm unh hnam hin dơnuh, unh hnam ƀơm tơnap kơyuơ đơ̆ng COVID -19 vă đe yĕt dăh hrôih xơđơ̆ng tơdrong erih. Dôm trong pơkăp jang duh đei tơring tơgŭm tơtom: “Xăh duh tơgŭm ăn Anih jang Apŭng, Anih jang tơgŭm rim F0 đei 10 kĭ phe, F1 chôt vih tơ̆ tơring noh 5 kĭ. Dôm bơngai năm jang tơ̆ âu tơ̆ to chôt vih pơlei pơla noh xăh pơm kiơ̆ Tơchơ̆t 68 vă tơgŭm ăn kon pơlei tơtom đei jên vă kon pơlei pơtoi pơm jang tơ̆ tơring păng pơtoi tơroi ăn kon pơlei nĕ kơ pơhơi, pơm kiơ̆ tơnăp tơdrong pơkăp 5K đơ̆ng Anih tơm Y tê̆.”

Đơ̆ng minh anih hơbuh pơrang jĭ Covid-19 hli hlơt mă blŭng kơ dêh char Đăk Lăk, jơnŭm pơgơ̆r tơring păng anih jang kơpal tơlĕch dôm trong jang vă hơmet klaih pơrang jĭ tơtom, truh dang ei tơdrong erih kon pơlei tơ̆ pơlei  Ea Bhok, xăh Ea Bhok, apŭng Cư Kuin tŏk bŏk đei xơđơ̆ng nhen adrol ki. Mă lei, hăm tơdrong hơbuh hli đơ̆ng pơrang jĭ Covid-19, kon pơlei nĕ kơ pơhơi, mă athei pơm kiơ̆ kơjăp dôm tơchơ̆t tang găn păng tơjră pơrang jĭ.

Lan chih păng pơre nơ̆r