VOV4.Bahnar - Jơnŭm chư pơglang ƀrê Lâm Đồng hlôi pơgŏr hop akŏm tơlĕch jang Tơdrong jang Iung jang kăl păng Năr plang ăn pham “Kơtŏh bri Pơlei tơm Pơkao” ‘măng mă 9 sơnăm 2021. Kiơ̆ vă jang, Tơdrong jang au gô đei pơgơ̆r lơ̆m 2 năr ‘nŏh năr 19 păng năr 20/6/2021. Tơdrong jang gô hơvơn 2.000 ‘nu bơngai vang plang ăn pham hăm gô iŏk đei dang 1.000 tơpu pham vă pơtrŭh ăn viện huyết học – truyền máu Trung ương. Kơ yuơ jĭ hơbŭh Covid-19 pơrăm kơtang kơna tơdrong jang sơnăm au đei pơgơ̆r kơ toei păng kiơ̆ rim hơnĭh jang vă tơlĕch jang kiơ̆ tang găn jĭ Covid -19 nhen: pơjing hơnĭh trŏ lăp hơvơn rim bơngai vang năm plang ăn pham, sơđơ̆ng bơ̆ jang pơrô̆ pơtho tơbăt tang găn jĭ Covid -19; pơm rơgŏh pơ ‘lơ̆ng hơdrol păng đơ̆ng rŏng plang ăn pham, pơtho pơtŏ yŭh tŏ, gom ƀŏ, ôp ti hăm đak pơgang păng oei hơtăih dĭh băl, pơtho păng jang kiơ̆ ƀlep ‘lơ̆ng trong pơkăp jang 5K.

Tơblơ̆ nơ̆r: Amazưt