VOV4.Bahnar – Tơdrong jang  “sŏng păng kơmai tĭnh ăn kơ oh” kơyuơ Jơnŭm pơgơ̆r teh đak tơlĕch jang hlôi păng tŏk bŏk đei tơlĕch jang tơ̆ dêh char Đăk Lăk, hăm tơdrong vang jang đơ̆ng lơ jăl jang păng anih jang mŭk drăm, anih jang ‘mêm bơnat. Lơ̆m minh khei minh puơ̆t tơlĕch jang, tơdrong jang hlôi tơgop đei hloh kơsô̆ jên păng tơmam drăm hăm kơjă hloh 5 tih hlj. Kiơ̆ đơ̆ng noh tơgop tơgŭm ăn lơ unh hnam đei tơdrong erih tơnap tap tơ̆ tơring ataih yaih xek tơlang tơdrong pơngơ̆t găh kơmăi kơmŏk, tơdrong tơroh ăn kon hơ ioh hŏk trư̆k tuyê̆n lơ̆m khei năr pơrang jĭ Covid-19 lơ̆m tơring oei hơbuh hli.

Oei dơ̆ng gô bơ̆ hla bar xơng iŏk sim data đei axong ăn hoh đơ̆ng anih jang mạng Vinaphone kơyuơ VNPT apŭng Cư Mgar tơgŭm kơtă ăh hnam trưng hŏk kơ kon drăkăn, ‘nhŏng Y Rít Kbuôr, minh unh hnam đei tơdrong erih tơnap tap tơ̆ pơlei Sút Mđưng, xăh Cư Suê ăn tơbăt, tơdrong tơgŭm âu jing kăp gĭt. Unh hnam xư đei ƀar ‘nu kon oei tơ̆ jăl kơđeh păng trung học, adoi hŏk trư̆k tuyê̆n kơyuơ kơ pơrang jĭ Covid-19 tŏk bŏk oei hơbuh hli. Unh hnam xư ưh đei jên vă dui chô̆ mạng internet, mưh tơmơ̆t jên lơ̆m điê̆n thoăi vă pơih 3G, 4G ăn đe kon hŏk trư̆k tuyê̆n noh huach lơ jên, tơnap hăm unh hnam hin dơnuh nhen xư. Hăm sim ưh kơ huach jên pơtoi pran đei tơgŭm, tơdrong pơngơ̆t găh tơdrong hŏk trư̆k tuyê̆n ăn kơ kon noh unh hnam hlôi đei xek tơlang: “Kon mă hơmol hŏk lăm 7, mă ‘lâ̆p noh hŏk lăm 1. Minh ‘nu hŏk ăh pơgê, minh ‘nu hŏk ăh kơsơ̆. Duh hŏk kiơ̆ điê̆n thoăi đĕch, ba athei adrin đĕch. Hmach bơnê kơ  VNPT hlôi tơgŭm ăn kon pơlei tơring ataih yaih vă đe kon hơ ioh gơh hŏk online.”

Yă Nguyễn Thị Bích Ngọc, Kơdră hnam trưng jăl kơ đeh Lê Thị Hồng Gấm, xăh Cư Suê, apŭng Cư Mgar ăn tơbăt, hăm tơring ataih yaih, tơring kon pơlei kon kông, oei đei lơ unh hnam tơnap tap găh tơdrong ăn kon hŏk trư̆k tuyê̆n. Lơ̆m kơplăh noh, pơrang jĭ lơ̆m tơring tŏk bŏk oei hơbuh hli hlơt, tơdrong hŏk trư̆k tuyê̆n hơbŏ oei pơdui đunh. Tơdrong tơgŭm sim data ưh kơ huach jên đơ̆ng anih jang mạng nhen VNPT, Viettel ăn mĕ ƀă hŏk tro păng bơngai pơtho hlôi tơgŭm kăp gĭt ăn tơdrong pơtho pơhrăm kơ hnam trưng: “Âu jing tơdrong tơgŭm kăp gĭt, kơlih nhen lĕ tôm đe oh noh tơnap tap, mạng internet vă hŏk ưh đei xơđơ̆ng. Noh tơdrong tơgŭm âu vă xơđơ̆ng ăn đe oh chă hŏk trư̆k tuyê̆n, mă duh pơm trong hiôk ăn mĕ ƀă hŏk tro, kơlih đe yĕt tơ̆ tơring mă lơ noh tơdrong erih tơnap tap”

Jing minh lơ̆m dôm anih jang mŭk drăm yuk trong hơlâu iŏk jang tơdrong “sŏng păng kơmăi tĭnh ăn kơ oh” lơ̆m tơring, ƀok Trịnh Văn Dũng, Phŏ Kơdră anih jang VNPT Đăk Lăk ăn tơbăt, kiơ̆ đơ̆ng Anih jang Pơtho Pơhrhăm, anih jang hlôi tơgŭm jên păng tơmam drăm hloh 1 tih hlj. Atŭm hăm noh hlôi axong dôm anih pơdjoi phat sŏng vă vei xơđơ̆ng sŏng ăn hơ ioh tơring ataih yaih gơh hŏk trư̆k tuyê̆n. Atŭm hăm noh, tơ̆ dôm anih jang tơ̆ apŭng duh chă tơgŭm sim data, tơgŭm ăn hoh kiơ̆ kơ tơdrong đei ƀôh tơ̆ tơring: “Pơrang jĭ Covid-19 tŏk bŏk oei hơbuh hli hlơt nhen dang ei noh lơ hnam trưng lơ̆m tơring tam mă gơh akŏm hŏk. Đe kon hơ ioh duh athei hŏk kiơ̆ pơkăp online păng lơ̆m kơsô̆ noh lơ unh hnam đe oh tơnap tap, ưh đei kơmăi, ưh đei đương truyên vă gơh hŏk. Iŏk đơ̆ng noh, kiơ̆ Anih jang Pơtho Pơhrăm, VNPT hlôi chă tơgŭm kơmăi tĭnh bảng păng sim data, tơdrong tơgŭm âu đei kơjă 1 tih hlj”

Kiơ̆ chih hơlen đơ̆ng Anih jang Pơtho Pơhrhăm dêh char Đăk Lăk, đơ̆ng rŏng minh khei minh puơ̆t tơlĕch jang “sŏng păng kơmăi tĭnh ăn kơ oh”, truh dang ei jâ̆p dêh char hlôi iŏk đei jên păng tơmam tơgŭm hloh 5 tih hlj. Lơ̆m noh, găh kang ƀô̆, bơngai jang lơ̆m kŏng đoan anih jang hlôi tơgop đei pơhlom 4 tih hlj ăn jên mong “kơmăi tĭnh ăn kơ oh”. Kơsô̆ nai noh kơyuơ dôm anih jang mŭk drăm, anih jang ‘mêm bơnat chă tơgŭm. Ƀok Đỗ Tường Hiệp, Phŏ Kơdră Anih jang Pơtho Pơhrhăm dêh char Đăk Lăk ăn tơbăt, jên păng tơmam drăm hlôi tơgop gô pơtruh ăn dôm Anih jang Pơtho Pơhrhăm. Kiơ̆ kơ tơdrong đei ƀôh mă anih jang gô răt kơmăi ăn đe hŏk tro đei tơdrong erih tơnap tap lơ̆m unh hnam hin dơnuh, unh hnam tơjê̆ hin dơnuh, hŏk tro tơnap tap kơyuơ đơ̆ng pơrang jĭ Covid-19 pơm ăn. Dang ei tơdrong jang duh oei pơtoi hơvơn tơgop lơ̆m tơpôl vang jang:  “Anih vei lăng kon pơlei dêh char hlôi pơgơ̆r Anih jang Pơtho Pơhrăm vang pơkăp trong chă hơvơn tôm tơpôl, rim anih jang lơ̆m pơkăp chĭnh trĭ duh nhen kon pơlei lơ̆m tơring kơ dêh char Đăk Lăk chă tơgŭm ăn anih jang pơtho pơhrăm, axong ăn hŏk tro tơnap tap, dôm hŏk tro hin dơnuh, hŏk tro ƀơm răm đơ̆ng pơrang jĭ Covid-19 vă gơh đei kơmăi tĭnh, kơmăi hŏk trư̆k tuyê̆n ‘lơ̆ng hloh, vei xơđơ̆ng ăn tơdrong pơdơh năm tơ̆ hnam trưng mă lei ưh đei pơdơh kơ hŏk”

Jâ̆p dêh char Đăk Lăk dang ei đei hloh 400.000 hŏk tro dôm jăl hŏk, kơyuơ pơrang jĭ Covid-19 hơbuh hli hlơt, hŏk tro jâ̆p dêh char athei hŏk trư̆k tuyê̆n. Mă lei, kiơ̆ chih hơlen đơ̆ng anih pơtho pơhrăm, đei hloh 67.000 rơbâu hŏk tro ưh đei kơmăi, đương truyên vă hŏk trư̆k tuyê̆n, dôm bơngai âu noh tơtă lơ̆m unh hnam hin dơnuh, unh hnam tơjê̆ hin dơnuh tơ̆ tơring ataih yaih. Tơdrong tơgŭm đơ̆ng dôm jăl jang păng dôm anih jang mŭk drăm, anih jang ‘mêm bơnat kiơ̆ tơdrong jang “sŏng păng kơmăi tĭnh ăn kơ oh” tŏk bŏk hơ ‘nhăk tơdrong xô̆ ăn lơ hŏk tro tơring ataih yaih, tơgŭm ăn tơdrong pơtho pơhrăm gơh ƀônh hiôk hloh.

Lan chih păng pơre nơ̆r