Lơ̆m hnam 'nao man kơjăp 'lơ̆ng đei kơjă hloh 1 tih hlj, ƀok Dà Cắt Tư kŭp yom hơtol rup Ƀok Hô, hla bar pôk bơnê gah tơdrong jang đei đơ̆ng rim bơngai lơ̆m unh hnam ah lăm sơng tơmoi. Kơtuh pơrŏ lơ tơmam drăm yua păng săch, hơdah hloh dôm kơsơ̆p săch gah khôi luơ̆t păng joh ayŏ kơ bơngai M’Nông.

Ƀok Dà Cắt Tư lăp hloh noh kơsơ̆p săch “Joh ayŏ kră sơ̆ kon kông M’Nông” yuơ kơdih po ƀok chih akŏm ah sơnăm 2013, akŏm lơ tơdrong nhen: nơ̆r hơri brông, hơri tơtơl, hơri pơđơ̆k pơtih pơtŏng. Ƀok tơroi:  “Đơ̆ng oei 'lơ̆p inh năm hŏk pơhrăm tơ̆ lơ tơring. Ah tih vơ̆, inh năm hŏk đăi hŏk tơ̆ pơlei tơm Hồ Chí Minh. Gơnơm thoi noh, inh băt hơdah hloh gah tơdrong kăp gĭt kơ khôi juăt bơngai M’Nông nhen tòng, pơ̆t, ntòng sơh păng dôm nơ̆r pơđơ̆k pơtih pơtŏng kon kông po. Đơ̆ng rŏng hŏk đang, inh vih tơ̆ pơlei pơla, pơtơm chă chih akŏm dôm nơ̆r pơđơ̆k kon kông jing săch. Minh tơdrong kăp gĭt hăm inh noh ah 'măng năm tơ̆ Hà Nội păng đei tơƀơ̆p Tổng Bí thư Nguyễn Phú Trọng. Ƀok tơtă akhan, dôm bơngai đei kon pơlei lui yom lơ̆m pơlei pơla kăl pơlan să tơdrong vei răk tơƀăk mong joh ayŏ kon kông po kơdih. Đơ̆ng noh inh roi chăm vă akŏm jơ năr chă chih akŏm dôm nơ̆r pơđơ̆k pơtih pơtŏng, tơdrong hơ-'mon kră sơ̆ kơ bơngai M’Nông, hăm tơdrong hơpơi 'meh răk 'măn ăn kôn mon kon sou ning nai kơnh”.

Akŏm jơhngơ̆m ăn tơdrong jang vei răk tơƀăk mong dôm kơjă joh ayŏ juăt jue kon kông, ƀok Dà Cắt Tư hlôi akŏm pơjing đei lơ khul chĭng chêng tơ̆ thôn Liêng Trang  1, thôn Dà Nhinh 1 păng Dà Nhinh 2. Dang ei dôm khul chĭng chêng ou hơnơ̆ng akŏm pơhrăm păng roi năr roi đei pơih să: lơ 'măng vang akŏm joh ayŏ hăm dôm tơring nai lơ̆m dêh char Lâm Đồng. 'Nhŏng Dà Cắt Ha Tiên, jang lơ̆m khul chĭng chêng tơ̆ xah Đam Rông 4 tơroi: “Yă ƀok sơ̆ hlôi răk ăn tơdrong juăt jue joh ayŏ kăp gĭt. Yuơ noh nhôn athei pơhrăm păng vei răk vă ưh đei tơhiong tơdrong joh ayŏ kon kông po.  Khul chĭng chêng nhôn hơnơ̆ng năm akŏm dôm tơdrong pơlong păng đei jơnei kăp gĭt. Kiơ̆ đơ̆ng noh nhôn hlôh vao hơdah hloh tơdrong gĭt kăl kơ tơdrong vei răk tơƀăk mong joh ayŏ juăt jue kơ hơdrung kon kông Tây Nguyên nhen M’Nông, K’Ho”. 

Vă tơgop vei răk tơƀăk mong kơjă joh ayŏ juăt jue kơ hơdrung kon kông, yơ̆ng ou ki, jơnŭm pơgơ̆r tơring hlôi asong atăm dơ̆ng 2 hơmrŭk chĭng chêng ăn dôm kâu lak ƀô̆. Ƀok Hót Ngát, juăt jang lơ̆m Hơnih Joh ayŏ xah Đam Rông 4, dêh char Lâm Đồng ăn tơbăt, lơ̆m khei năr truh, tơring gô pơtoi hơtŏk dôm kâu lak ƀô̆ chĭng chêng tơ̆ tôm thôn, pơlei. Hăm dôm bơngai dăp đon dăp bơnôh nhen ƀok Dà Cắt Tư,  hơnih jang kơpal hlôi chih akŏm hla bar pơtruh ăn Jơnŭm pơgơ̆r teh đak pôk hơpah hơnăn ngê̆ nhơ̆n ưu tŭ. Ƀok Liêng Hót Ngát ăn tơbăt: “Lơ̆m xah hŭi kơ đei bơngai dăp đon dăp bơnôh nhen ƀok. Gơnơm tơdrong tơroi păng hơvơn đơ̆ng ƀok mă joh ayŏ chĭng chêng kơ bơngai M’Nông, K’Ho tơ̆ ou đei hơtŏk vei răk tơƀăk mong nhen dang ei”.

Sơnăm ou tŏk 75 sơnăm bơih, ƀok Dà Cắt Tư tơ̆ xah Đam Rông 4, dêh char Lâm Đồng adoi oei hăt hot chih akŏm rim nơ̆r hơri, tơdra chĭng chêng, tơdrong tơroi kră sơ̆ nhen vei răk tơdrong tơm dơnơm kơ kon pơlei kon kông po. Đơ̆ng dôm hlak hla bar kơdih po chih răk truh tơ̆ dôm kâu lak ƀô̆ chĭng chêng kơdih po ƀok pơjing, pơtho pơhrăm, jing tơdrong pơdjoi tơnăp kơ minh tơdrong joh ayŏ. Gơnơm tơnăp păng gơh hơgei nhen ƀok Dà Cắt Tư, joh ayŏ M’Nông ưh hơdrô̆ đei vei răk mă oei đei tơdrong hơrih 'nao, pơlan să lơ̆m chăl hơrih 'nao hrei ou.