Yak hlŏh 80 sơnăm, Radio nơ̆r pơma Việt Nam jing bơngai tôch juăt hăm pơlei pơla Tây Nguyên. Ưh lăp hơnhăk truh dôm tơdrong kơtơ̆ng ang, dôm ƀai hơri brông, ƀai tôn chĭng, reh tĭngning đĕch, mă mơ̆ng tơdrong tơroi đơ̆ng radio nơ̆r pơma Việt Nam, oei tơgŭm ăn mih ma duch nă hlôh vao dơ̆ng găh tơdrong choh jang xa, rei pơtăm, vei lăng bri ‘long, chĕp vei kơjăp dôm tơdrong juăt ‘lơ̆ng đơ̆ng sơ̆...

Gơnơm thoi noh, kon pơlei pơ̆n tơplih jơhngâm đon, jang tŏk, pơjing tơdrong arih xa ‘nao, phĭ tơtŏ dơnŏ ‘lơ̆ng. Kon pơlei kon kông Tây Nguyên ling lang năng Radio jĭ bơngai boăl juăt hăm kơdih kâu. Ƀok Y Thành, 68 sơnăm, kră pơlei plei K’Dung, xăh H’Ra, dêh char Gia Lai, čhưu jơhngâm tơroi: “Kiơ̆ đơ̆ng Radio inh đei mơ̆ng ƀơ̆r Ƀok Hô pơre Tuyên ngôn Độc lập ƀât sơnăm 1945 sơ̆. Inh băt nhen, tôch hơiă! Kŭm gơnơm đơ̆ng Radio mă ‘năr 30-4-1975, kon pơlei gơ̆h băt tơring Pơbăh đĭ tơblăh iŏk rơngei bơih. Kơplăh dŏh sơ̆ nhôn oei tơ̆ tơring kăn kư̆ kơna mưh băt tơdrong ‘nâu ‘nŏh kon pơlei hưch hanh, jreu tơkĕch, čhôk ‘nă... Mă 2 dơ̆ng inh mơ̆ng đei Radio nơ̆r pơma Việt Nam oei tơ̆ Đăk Lăk đei nơ̆r Bahnar, nơ̆r Jarai, nơ̆r Sêdang păng dôm nơ̆r kon kông nai hai... inh tôch hơiă mưh mơ̆ng nơ̆r kon kông bơ̆n đei chĕp vei, pơih lơ̆m đai. Đai oei pơtho ăn kon pơlei rong kon tơrong, rei pơtăm, pơjing tơdrong arih xa ‘nao... Kơdih kâu inh hơnơ̆ng chă mơ̆ng đang kơ ‘nŏh tơroi, pơtơ̆ng ăn mih ma duch nă dôm tơdrong đơ̆ng Đai pơtho.”