Bơ̆n 'nao mơ̆ng bơih tơdra đing hlôm (buôt čhôč) păng hơri kưt kơyuơ ngê̆ nhơ̆n Y Đhin Niê (Ama Ruin), oei tơ̆ pơlei Triă, xah Ea Tul, dêh char Đăk Lăk hlôm. Sư jĭ ngê̆ nhơ̆n mơlôh – bơngai băt chă hơri hơ-'mon Êđê, băt chă pơm đei đing hlôm juăt jue kơ bơngai Êđê. Ngê̆ nhơ̆n Y Đhin tơroi, đing hlôm ưh hơdrô̆ jĭ đing kram ƀônh ƀŏ, mă jing minh tơdrong tơroi gah joh ayŏ, athei đei tơdrong hiôk 'lơ̆ng păng băt gah tơdra. Mưh đe sơnăm mơlôh ưh đei pơhrăm, ưh vei răk, noh dôm tơdra đing hlôm, đơ̆ng hơri kưt, eirei gô ƀơm hiơt hiong:  “Lơ bơngai tơchĕng pơm đing hlôm noh ƀônh, mă lei tơpă noh ưh kơsĭ bơngai yơ adoi gơh pơm, kơlih hăp athei đei tơdrong băt gah tơdra tơnăp. Hrei ou, lơ̆m pơlei, đe ngê̆ nhơ̆n 'lŏ sơnăm hlôi vih hăm yă ƀok bơih, oei đe sơnăm mơlôh noh oei hơdrô̆ inh đĕch gơh pơm đing hlôm ou. Inh gô pơtho ăn đe kôn mon kon sou băt trong pơm đing hlôm, vă tơdrong joh ayŏ kăp gĭt kon kông po kơdih ưh đei hiơt hiong”

Tơ̆ hơla bơbŭng hnam kơjung tơ̆ pơlei Phơng, xah Ea Tul, dêh char Đăk Lăk, ngê̆ nhơ̆n Y Khĭm Niê Siêng tôn rim tơdra chĭng chêng, tơroi ăn đe sơnăm mơlôh mơ̆ng gah dôm tơdrong et xa tih, gah tơdrong kăp gĭt kơ rim tơdra tôn. Hăm ƀok, rim tơdra chĭng chêng jing minh nơ̆r tơƀlŏk joh ayŏ Êđê oei ah đei pơdjoi. Ƀok tơchĕng ah ƀôh đe sơnăm mơlôh pă đei tơklĕp hăm tơdra chĭng chêng, noh akŏm ăn tơdrong pơtho pơhrăm. “Chĭng chêng jing minh tơmam pơre tơdra ưh gơh kơƀah lơ̆m tơdrong hơrih pơlei pơla kơ bơngai Êđê. Chĭng chêng hơnơ̆ng đei yua lơ̆m tơdrong et xa soi tơbeh kăp gĭt nhen et sŏng ƀa 'nao, groong bơngai lôch (akŏm tơdra hơgơ̆r), et soi kơ jơhngơ̆m jăn ăn bơngai hlôi ƀuh kơpô rơmo, dah mă et tŏk hnam 'nao... Tơdra chĭng chêng tơguăt hăm rim tơdrong joh ayŏ, đon lui kơ pơlei pơla. Chĭng chêng ưh gơh tơklah hăm tơdrong hơrih kon pơlei pơla. Kơyuơ noh, mưh nhen đe sơnăm mơlôh lơ̆m pơlei tam mă băt, noh nhôn jĭ bơngai yuk hơlou athei pơtho pơhrăm vă kon sou ưh kơ hiơt lê̆ tơdrong juăt jue 'lơ̆ng rŏ mă yă ƀok pơsư̆ ăn”

Atŭm hăm tơdrong pơm tơmam pơre nơ̆r, ngê̆ nhơ̆n Y Lương Niê (Aê Thun) tơ̆ pơlei Triă, xah Ea Tul, dêh char Đăk Lăk noh tơguăt hăm đing hlôm đing năm. Đơ̆ng tơdra hĕl sơ-'ngon lơ̆m groong bơngai lôch truh tơdra sô̆ chơt kơ tơdrong et xa, ƀok tơchĕng vă pơtho ăn kôn mon kon sou vă tơdra đing năm păr ang ling lang lơ̆m tơpôl pơlei pơla:  “Sơ̆ ki, nơ̆r re đing năm hơdrô̆ đei hlôm ah mă groong bơngai lôch đĕch. Hrei ou, hăp oei păr ang lơ̆m lơ tơdrong et xa kơ pơlei pơla. Vă vei răk tơƀăk mong joh ayŏ kăp gĭt ou, tơdrong kăp gĭt noh đe sơnăm mơlôh athei pơhrăm păng pơdjoi"

Đơ̆ng tơdra đing hlôm hiôk 'lơ̆ng, truh tơdra đing năm rơnguơ̆ rơnguơ, đe ngê̆ nhơ̆n bơngai Êđê tơ̆ Đăk Lăk tŏk bŏk oei hơdrin vă dôm tơdra kăp gĭt kơ kon pơlei păr ang ling lang lơ̆m pơlei pơla. Đe sư oei pơdjoi tơdrong nhan lăp păng hơpơi 'meh đe sơnăm mơlôh băt 'mêm, băt chă pơhrăm, vei răk tơƀăk mong joh ayŏ kon pơlei kon kông kơdih.