Tŏk bŏk lơ̆m cham rông ƀuôn Ia Mrơn, tơring Ia Pa, dêh char Gia Lai, gơ̆ng ga duĭt kơjung đei pơm ‘lơng liĕm, ƀrông ƀrang. Tăp dăr gơ̆ng ga ‘noh rim tơmam drăm vă soi tơbeh đei kon pơlei proh hơmet tôm; ‘noh đei ge tơdrô, mĭnh tŏ nhŭng păng ƀar reo ƀa. Ƀok soi Rô Bhak, hrŭk ao tanh ‘lơ̆ng liĕm, tang măt ăn kon pơlei chă soi tơbeh ƀa ‘nao.

“Ơ yang kông yang đak yang nak yang hrêl, yă hri! Năr ou pơlei nhôn hlôi kĕch yoă ƀa đang. Gơnơm ‘mi rŏ tŏ hơlăng, gơnơm yang lăng tông nông gia, ƀa hơƀo jing ‘lơ̆ng plei ăl rong ‘me ăn kon pơlei nhôn phĭ tơtŏ dơnŏ ‘lơ̆ng. Dang ei, pơlei pai por hle, ge tơdrô păng kon tơrong soi tơbeh, hơvơh hơvơi kơ yang vang jur et sa, vei lăng năng tông ăn mir na kon pơlei nhôn”

Đơ̆ng rŏng mĭnh pơyan jang sa gleh hrat, pơgơ̆r “Et jur sa” ‘noh jơ ‘năr vă bơngai Jarai tơbăt ăn jơhngơ̆m đon hơnê kơ kơ yang, yang hơƀang mĕ ƀă yă ƀok lăng tông nông gia ƀa hơƀo jing ‘lơ̆ng,plei ăl. Yă Nay H’Luir oei lơ̆m ƀuôn Chơma, tơring Ia Pa vang năm et jur sa tơbăt, ‘nou jĭ jơ ‘năr kon pơlei lăng dơ̆ng dôm tơdrong bơ̆ jang sa ou ki, pơtruh nơ̆r ƀơ̆r đon hơpơi ‘meh vă pơyan đơ̆ng rŏng jang sa đei iok yoa kơjăp dơ̆ng. “Tơring Ia Pa pơgơ̆r kơ̆m kang kơnang giĕng joăt joe bơ̆n sơ̆ păng Pơgơ̆r Et jur sa kơ bơngai Jarai ba ƀôh hơ iă tơpă mơ̆n. Tôn chĭng chêng, hơsoang ưh kơ gơh kơƀăh dôm tơdrong joăt joe kơ bơngai Jarai. Mă kăl pơmai oh hrŭk hơbĕn ao tanh đơ̆ng bơngai Jarai chă tanh kơdih ‘lơ̆ng dêh. Et jur sa tŏk bŏk vă jê̆ hiong hiơt, mă lei đei Teh đak pơgơ̆r dơ̆ng lơ lou hơ iă dêh. ‘Nou jĭ tơdrong joăt ‘lơ̆ng hơ iă đơ̆ng kră sơ̆; mưh kĕch yoă ƀa đang, sŏng sa ƀa ‘naolei kăl soi tơbeh kơ yang ‘mơ̆i, băt bơnê kơ yang lăng tông nông gia, hơpơi ăn rim răih bơngai pran jăng grăng akou, hơnŭk hơnoa”.

Tơdrong pơgơ̆r dơ̆ng “Et jur sa” tơ̆ tơring Ia Pa, dêh char Gia Lai hơvơn đei vang năm đơ̆ng kon pơlei pơla, mă kăl ‘noh rim kră pơlei, ngê̆ nhân păng dôm bơngai hlôh vao găh tơdrong kơ̆m kang kơnang giĕng. Ƀok Ksor Ther, Sơ̆ jang Kơdră chĕp pơgơ̆r Hơnih vei lăng Pơtho pơhrăm Ia Pa, dêh char Gia Lai tơbăt, hơdrol vă pơgơ̆r dơ̆ng “Et jur sa: kơ bơngai Jarai, hơnih bơ̆ jang hlôi apĭnh jet gia rim kră pơlei păng dôm bơngai hŏk jrŭ lơm tơring.“ ‘Nou jĭ sơnăm mă blŭng tơring pơgơ̆r ba ƀôh hơ iă dêh. Hơdrol pơgơ̆r, kơdră chĕp pơgơ̆r tơring hlôi đei chă apĭnh jet gia kon pơlei, tơring răt chĭng chêng ăn rim pơlei, hơmet ăn hơbĕn ao tanh ăn kôn mon kon sou hơdruh tơdăm chă hrŭk păng pơhrăm tôn chĭng chêng, hơsoang. Et jur sa, tơdrong joăt lơ̆m pơkong păng et ming đak đei pơgơ̆r dơ̆ng lơ̆m ‘măng mă ou, ba ƀôh hơ iă dêh, chơt dêh vă rim răih bơngai băt truh tơdrong oei sa joăt joe ‘lơ̆ng rŏ sơ̆ ki ou”.

Tơdrong pơgơ̆r dơ̆ng “Et jur sa” tơ̆ Ia Pa, dêh char Gia Lai tơklep hăm tơdrong jang vei răk tơƀăk mong, atŏk tơ iung dôm tơdrong ‘lơng rŏ lơ̆m oei sa găh lơ̆m Tơdrong jang tơm teh đak găh atok tơ iung tơdrong oei sa joh ayŏ sơnăm 2026. Ƀok Nguyễn Thái Sơn – Kơdră chĕp pơgơ̆r Hơnih tơm vei lăng Joh ayŏ, Kơtơ̆ng ang păng Đă ƀŏng lŏng tơplŏng kơdou tơring Ia Pa tơbăt, khei năr kơnh, tơring hơnơ̆ng pơgơ̆r dơ̆ng rim tơdrong pơgơ̆r kơ̆m kang kơnang giĕng joăt joe đơ̆ng sơ̆ vă vei răk păng atŏk tơ iung tơdrong oei sa ‘lơ̆ng rŏ kơ rim hơdrech hơdrung.“ ‘Nou jĭ pơgơ̆r Et jur sa đei pơgơ̆r tơ̆ ƀuôn Ia Mrơn, jĭ tơdrong oei sa joatw joe ‘lơ̆ng rŏ kơ bơngai Jarai. Tơdrong pơgơ̆r kăl chĕp vei hơnơ̆ng vă vei răk tơƀăk mong tơdrong oei sa ‘lơ̆ng rŏ sơ̆ ki. Lăp đơ̆ng rŏng pơgơ̆r ou ‘noh jĭ pơgơ̆r tôn chĭng chêng, rim tơdrong kơ̆m kang kơnang giĕng ‘lơ̆ng rŏ vă jê̆ hiong hiơt, ‘noh Hơnih tơm vei lăng Joh ayŏ gô pơgơ̆r dơ̆ng vă jơhnơr mơlôh kiơ̆ yok rok jơ̆ng”.

Đơ̆ng rŏng soi tơbeh, ‘noh tơdrong pơgơ̆r et sa tŏ ƀuôn Ia Mrơn, tơring Ia Pa hlôi jing rơ ông rơ anglơ̆m jơva chĭng chêng păng hơsoang. Khul tôn chĭng chêng đơ̆ng dôm pơlei lơ̆m tơring tơƀơ̆p dih băl, vang chă tôn chĭng chêng, pơma dơnuh; kon pơlei păng tơmoi jei vang luuh lăng, vang pơlong tơdur, plŏng ƀi hơrĭng ou to. Dôm hơdrơ̆r pơdă tơƀôh tơmam drăm choh jang sa, ‘long păng ‘nhĕm ‘nhot kơ kon pơlei hlôi tơgop pơm ‘lơ̆ng rŏ hơbŏ nhen hloh dơ̆ng lơ̆m năr et ot ou.