Đắk Lắk ‘măn vă jê̆ 186 ti hlak jên vă atŏk tơiung tơdrong joh ayŏ kơ dŏ xoang sơnăm 2026 tơlĕch ăn 102 xăh, phường. Tơdrong ‘nao ‘nŏh khul kơdră pơgơ̆r tơ̆ xăh gơ̆h kơchăng chih tơlĕch dôm tơdrong jang, jên jang păng tơroi ăn Jơnŭm pơgơ̆r kon pơlei tơ̆ tơring tơchơ̆t ăn, pơ ‘nhŏ hơdrol ăn tơring hơtăih yăih, tơring kon pơlei kon kông oei ưh măh tôm tơmam joh ayŏ kơ dŏ xoang.

Tơ̆ dêh char, vă jê̆ 80 ti hlak jên đei tơlĕch ăn 6 tơdrong jang, đei hơmet pơ ‘lơ̆ng Anih ‘măn răk tơmam Đắk Lắk, Anih mong đŏk hla ar Hải Phú, hơmet ming Hnam joh hơri hơxoang Diên Hồng, cham Anih ‘măn răk tơmam Phú Yên păng hơmet ming 2 anih gru groa gĭt kăl kơ teh đak. Tơdrong jang akŏm tưk tơiung anih joh ayŏ kơ dŏ xoang, kơmăy kơmŏk pơyoa ăn jŏh ayŏ kơ dŏ xoang, atŭm hăm ‘nŏh chĕp vei kơjăp dôm tơdrong juăt ‘lơ̆ng đơ̆ng dôm hơdrĕch kon kông.

Lơ̆m noh, anih đei tơgŭm vă hơmet pơ ‘lơ̆ng hơdrol ‘nŏh jĭ Anih joh ayŏ kơ dŏ xoang, hnam hŏk hôp tơpôl. Tơdrong klăih song jên âu đei hơmĕng pơm hơtŏk đei tơdrong arih xa găh jơhngâm đon, pơm tơjur ƀiơ̆ tơdrong ưh hơtŏ băl găh đei yoa đơ̆ng joh ayŏ kơ dŏ xoang kơplăh dôm tơring. Dôm xăh athei iŏk yoa jên mă trŏ hăm tơdrong vă jang, đei yoa ‘lơ̆ng, veh ver tơdrong tơlĕch jên răh rai, pơhuach kư̆ kă.