Drung kơsơ̆ hơtuch giĕng, hnam hop akŏm pơlei ƀon  Đắk N’Drung, tơring Đức An, dêh char Lâm Đồng rơ ông chĭng chêng. 25 ‘nu bơngai hŏk đei ngê̆ nhân pơtho ăn đơ̆ng chă chĕp chĭng chêng truh chă tôn lơ liơ mă trŏ lăp hloh. Hloh đơ̆ng hŏk pơhrăm, jơva chĭng chêng roi năr roi hiôk, tơklep hăm jơhngơ̆m đon. Mŏ Thị Hợi, chơt hơ iă tơroi:"Hơdrol kơ hŏk, ba tơchĕng pơhrăm tôch chĭng chêng ‘noh mơmat dêh. Mă lei mưh vang pơhrăm, ba ƀôh ưh kơ măh tơnap dang yơ mơ̆n. Truh dang ei ba gơh tôn pêng ƀai bơih. Tôch hơ iă ba hlôi băt tôn chĭng chêng. Ba gô hơdrin hloh dơ̆ng vă tơgop vei răk tơƀăk mong tơdrong oei sa joăt joe kơ hơdrĕch hơdrung bơ̆n."

Lăm pơtho tôn chĭng chêng ‘măng mă blŭng đei tơdrong tơgŭm djru đơ̆ng khul kơdră chĕp pơgơ̆r tơring Đức An păng Hơnih vei lăng Joh ayŏ kơdŏ soang dêh char Lâm Đồng. Lăp đơ̆ng rŏng lăm hŏk pơtôch, rim pơmai oh oei hơnơ̆ng vei kơjăp chă pơhrăm tôn tơ̆ hnam hop akom pơlei ƀon Đắk N’Drung. Hơnơ̆ng rim gơmăng hơtch giĕng, pơmai oh proh hơmet dơ̆ng tơdrong jang sa chŭn mir, tơdrong lơ̆m ŭnh hnam vă atŭm dih băl pơhrăm ming dơ̆ng dôm ƀai chĭng chêng, chă pơtho dih băl tôn lơ liơ mă ƀlep, mă hiôk. Dôm jơ hrăm ‘noh hlôi pơm ăn tơdrong tôn chĭng chêng roi năr roi joăt joe, mơ̆t lơ̆m jơhngơ̆m klơm klak kon pơlei. Yă Điểu Thị Huế - Kơ iĕng Ƀĭ thư Chi ƀô̆, Kơdră Khul bơ̆ jang Mặt trận ƀon Đắk N’Drung tơbăt: "Tơ̆ kơ ‘năr, pơmai oh jang sa, pơvih pơvăn ăn ŭnh hnam. Truh gơmăng ‘noh năm tơ̆ hnam hop akom pơlei vă pơhrăm tôn ching chêng. Bu bu jei chơt hơ iă ‘nă hal. Gơnơm tơdrong lăng ba, tơgum djru păng pơjing rơvơn đơ̆ng Hơnih vei lăng joh ayŏ kơdŏ soang dêh char, tơring, kon pơlei nhôn đei dơng rơvơn vei răk tơƀăk mong păng atŏk tơ iung dôm tơdrong gĭt kăl lơ̆m oei sa joăt joe sơ̆ ki kơ hơdrĕch hơdrung bơ̆n”.

Hăm rim ngê̆ nhân, tơdrong pơtho tôn chĭng chêng ưh khan lăp pơtho chă tôn, mă lei pơjao dơ̆ng dôm tơdrong hlôi đei, tơguưm ăn jơhnơr mơlôh băt hlôh ƀôh hơdăh tơdrong hơrih sa kơ pơlei pơla. Hloh đơ̆ng rim ‘măng pơhrăm, Ngê̆ nhân Thị Dryan ‘meh vă đei dơ̆ng lơ bơngai mơlôh chă pơhrăm tôn chĭng chêng:"Tơring Đức An hlôi pơjing rơvơn ăn pơlei pơuh lăm pơtho tôn chĭng chêng vă rim boăl mơlôh đei jơhngơ̆m đon hưch hanh hŏk pơhrăm. Hloh đơ̆ng lăm pơtho, nhôn ‘meh vă pơtho đôm ƀai chĭng so ăn jơhnơr mơlôh, vă kôn mom kon soi ưh kơ hiơt dôm tơdrong đơ̆ng mĕ ƀă yă ƀok chă pơsư̆ ăn kơ bơ̆n."

 Vă hơlêm rim ngê̆ nhân hơnơ̆ng chă pơtho ăn dôm tơdrong joăt joe ‘lơ̆ng rŏ sơ̆ ki ăn jơhnơr mơlôh, lăp đơ̆ng rŏng hơgrop tơring, Hơnih vei lăng kon pơlei tơring Đức An hlôi pơjing Tơdrong tơchơ̆t hơpăh kon jên rim khei ăn Ngê̆ nhân Ưu tú kơ ƀon Đắk N’Drung. Lơ̆m ou, NNƯT Thị Phyơn, Bơngai chĕp kơ̆l khul Joh ayŏ kơdŏ soang ƀon Đắk N’Drung, đei tơgŭm ăn hloh 3 triu hlak jên lơ̆m 1 khei. Hăm yă, ‘nou jĭ tơdrong lăng ba tôch git kăl lơ̆m tơdrong vei lăng năng tông tơdrong oei sa joăt joe ‘lơ̆ng rŏ sơ̆ ki kơ bơngai M’nông. “Ba tôch chơt hơ iă păng bơnê kơ Đảng, Teh đak hlôi tơgŭm djru ăn kơ ĭnh 3 triu hlak jên lơ̆m 1 khei. ‘Nou jĭ tơdrong hơlêm tôch tih tên vă kơ ba hơnơ̆ng vei răk tơƀăk mong tơdrong oei sa joăt joe sơ̆ ki. Ba gô hơnơ̆ng chă pơtho ăn tôn chĭng chêng ăn jơhnơr mơlôh, ba khul drŏ kăn tôn chĭng chêng atŏk tơ iung hloh dơ̆ng, vă kôn mon kon sou tơgoăt hơnơ̆ng tơdrong oei sa joăt joe ‘lơ̆ng rŏ sơ̆ ki đơ̆ng mĕ ƀă yă ƀok chă pơsư̆ ăn."

Đơ̆ng dôm tơdrong gĭt kăl oei sa ‘lơ̆ng rŏ đei vei lăng, tơring Đức An tŏk bŏk pơchoh trong tơ iung pơjing hơnih tơmang pơhiơ̆ pơlei pơla tơ̆ ƀon Đắk N’Drung. Tơmoi gô đei chă lăng, mơ̆ng tôn chĭng chêng, rim tơdrong pơgơ̆r kơ̆m kang kơnang giĕng, dui brai vai tanh khăn păng pai por ‘nhot kơ bơngai M’nông. Lơ̆m ou, hnam hop akom pơlei jĭ hơnih tơm, pơdă tơƀôh dôm tơmam drăm joăt joe sơ̆ ki, tơƀôh tơbăt tơdrong oei sa joăt joe ‘lơ̆ng rŏ kơ tơring păng rim tơdrong pơgơ̆r tơmang pơhiơ̆ joh ayŏ pơlei pơla. Yă Thị Rơi, Bí thư Chi bộ ƀon Đắk N’Drung, tơbăt:"Tơdrong chă pơrô̆ hơvơn pơmai oh, đoàn viên hơdruh tơdăm vang pơhrăm tôn chĭng chêng ưh khan lăp vei răk tơdrong oei sa joăt joe ‘lơ̆ng rŏ sơ̆ ki mă oei pơm hơtŏk tơdrong tơgoăt pôm nơ̆r ƀơ̆r đon kon pơlei pơla. Tơring hlôi tơmơ̆t kon jên ming man hnam hop akom pơlei ăn kơ pơlei, pơjing rơvơn vă kon pơlei hop akŏm, pơhrăm ou to. Nhôn hơpơi ‘meh vă hơnhăk dôm tơmam drăm iŏk yoa joăt joe sơ̆ ki chă pơdă tơ̆ ou vă jơhnơr mơlôh băt hloh dơ̆ng tơdrong oei sa joăt joe kơ hơdrĕch hơdrung."

Đơ̆ng dôm tơpang ti chai kơhrưih kơ yuơ tŏ kial jang mir, dôm đe drŏ kăn bơngai M’nông oei lơ̆m ƀon Đắk N’Drung tŏk bŏk vei răk pơhngol ăn jơva ching chêng pơlei pơla. Pla ŭnh lơ̆m hnam hop akom pơlei oei hơnơ̆ng khơ̆ng bơblông rim gơmăng hơtuch giĕng, jơva chĭng chêng oei djơ djrĭng vang vơch ba tơdrong oei sa joăt joe ‘lơ̆ng rŏ sơ̆ ki kơ pơlei yak hơtăih plăih kơjung atŭm hăm tơdrong atok tơ iung kơ pơlei pơla Đức An, Lâm Đồng.