Festival đei pơgơ̆r tơ̆ phương Pleiku, xah Biển Hồ păng minh ƀar tơring tơjê̆ kơ dêh char Gia Lai, akŏm đei jê̆ 1.500 ngê̆ nhơ̆n. Pơih blŭng ăn tơdrong akŏm tơ̆ xah Biển Hồ đơ̆ng năr 30/10 truh năr 1/11, hăm lêh pơtơm tơ̆ cham rông kơ pơlei Ia Gri. Akŏm kơchơ pơhlom 30 hơnih akŏm pơdah tơmam drăm xa, tơmam drăm OCOP, tơmam kăp gĭt kơ tơring. Năr 31/10, xah Biển Hồ tơbang tơmam drăm tơmang pơhiơ̆ tơpôl pơlei Ia Nueng păng hơmet dơ̆ng Tơdrong et tŏk rông 'nao kơ bơngai Jrai tơ̆ pơlei Ia Gri. Atŭm hăm khei năr ou, tơdrong pơlong kơdou “Gia Lai City Trail – Hơpơi 'meh tơring bri kông” tơroh hăm tơdrong tơplŏng kơdou păng chă hơlen băt cham char plenh teh kơ tơring.

Đơ̆ng năr 6 truh năr 8/11, dôm tơdrong akŏm tơ̆ phương Pleiku, đei lêh yak pơrŏ trong kơphô̆, akŏm joh ayŏ juăt jue, tơbang tơmam drăm xa, tơmam choh pơtăm păng kaphê Gia Lai.  Tơdrong pơdah joh ayŏ “Kơmăng pơdah chĭng chêng” pơgơ̆r ah kơmăng năr 7/11 tơ̆ Cham să Đại Đoàn Kết, tơƀôh dơ̆ng tơdrong joh ayŏ tơguăt hăm tơdrong hơrih kon pơlei, vă tơmoi băt vao hơdah gah mŭk drăm kiơ̆ đơ̆ng tơdrong akŏm, tơdrong jang păng hơrih xa kơ kon pơlei kon kông. Ƀơ̆t 'măng ou, Gia Lai pơgơ̆r lêh tơbang tơchơ̆t mŭk drăm kăp gĭt kơ teh đak hăm 3 hơmrŭk chĭng chêng Kơ Đơ kơ bơngai Jarai. Hơmrŭk chĭng chêng so đei 8 tŏ, dang ei đei vei răk tơ̆ Hơnih Pơdah tơmam so Pleiku.