Ah hơnih rông kơ pơlei Ia Gri, xah Biển Hồ akŏm ƀenh kon pơlei păng tơmoi truh. Jơva chĭng chêng rơ-ông rơ-ang, hrau atŭm hăm dôm tơdra kơ tơmam reh tôn kon kông. Ngê̆ nhơ̆n Rơ Châm Chốt, truh đơ̆ng pơlei Mrông Yố, xah Ia Phí, dêh char Gia Lai chơt hơ-iă tơroi: “Inh truh tơ̆ ou 'nhăk ba brŏ tĭng nĭng, minh tơmam tôn reh kon kông, vă atŭm pơdah ăn kon pơlei păng tơmoi chă mơ̆ng lăng. Tơdrong mă pơm kơ inh hơ-iă hloh 'noh, ƀôh rông hlôi keh đang atŭm hăm pơkao dur yuăn chôh dreng 'lơ̆ng tơpă”.

Hăm pơmai Mơ Ly, truh đơ̆ng Đức Cơ, dêh char Gia Lai, ou jĭ 'măng vă pơmai gơh tơgop nơ̆r hơri, atŭm hăm rim bơngai hrau lơ̆m tơdrong akŏm păng vang pơtruh lơ̆m năr sô̆ hơ-iă ou: “Inh chơt hơ-iă đei truh akŏm păng hơri minh ƀai kơ tơring Tây Nguyên, hơ-'nguơ̆u kơ Đảng. Inh kŭm chơt hơ-iă kơlih xah Biển Hồ asong ăn năm akŏm Festival chĭng chêng sơnăm ou. Pơkao dur yuăn 'lơ̆ng tơpă, inh 'meh vă rim bơngai truh tơ̆ ou chă hơlen lăng lêh akŏm”.

Đei bơngai truh hăm Chư Đang Ya kơlih lăp kơ tơdrong guăng 'lơ̆ng kơ pơkao dur yuăn, đei bơngai 'meh hơlen băt dôm tơdrong akŏm joh ayŏ, kŭm đei bơngai 'meh đang măt ƀôh dôm tơdrong mă hơdrol ki đe sư băt kiơ̆ kơ um rup đĕch. Pơmai Y Nư đơ̆ng Kon Tum đơ̆ng hrôih truh Chư Đang Ya hơdrol kơ jơ pơtơm. Pơmai ăn tơbăt, dôm tơdrong tơroi gah lêh akŏm đei jơ̆p jang lơ̆m mạng tơpôl păng hơnih jang tơroi tơbăt hlôi tơ-iung tơdrong 'meh băt, pơm ăn kơ pơmai 'meh truh hơlen băt kơtă hloi:  “ 'Nou jĭ 'măng mă blŭng inh truh hăm Chư Đang Ya. Ƀôh đe chih tơroi lơ̆m mạng akhan tơ̆ ou đei lêh akŏm chơt hơ-iă 'noh inh kŭm 'meh năm truh chă tơmang lăng. Inh 'meh lăng dôm tơdrong jang kơ lêh akŏm, tơmơ̆ng đe chă hơri, lăng đe hơsuang, lăng đe tanh brai păng tơmang lăng dôm hơnih 'măn pơdah tơmam drăm tơ̆ ou”

Oei hăm pơmai Lan, lêh akŏm pơkao dur yuăn păng chĭng chêng Chư Đang Ya jing minh tơdrong hơlen băt kăp gĭt mă hlôi đei sơnăm hơrih jang xa tơ̆ Gia Lai: “Inh hơrih tơ̆ Gia Lai đei 5 sơnăm bơih mă lei ou jĭ 'măng mă blŭng inh năm truh hăm lêh akŏm pơkao dur yuăn, lêh akŏm chĭng chêng Chư Đang Ya. Inh hiôk chơt lơ̆m đon. Mă kăl, pơkao dur yuăn đei lơ dêh, pơjing đei cham char plenh teh tôch 'lơ̆ng. Mưh bơngai ayơ tam mă truh hăm lêh akŏm pơkao dur yuăn noh dah hơdrin năm truh akŏm lơ̆m minh 'măng hơ”.

Ưh hơdrô̆ hơvơn lơ bơngai truh tơmang lăng, hơlen băt, Festival chĭng chêng păng Giĕng lêh akŏm pơkao dur yuăn – Kông unh Chư Đang Ya oei đei lơ bơngai jang gah tơmang pơhiơ̆ tơrĕk truh. Năm truh tơ̆ Chư Đang Ya lơ̆m khei lêh akŏm sơnăm 2026, yă Phan Thị Thu Minh, Kơdră minh hơnih jang tơmang pơhiơ̆ tơ̆ Hà Nội ăn tơbăt: “Ƀơ̆t lêh akŏm pơkao dur yuăn sơnăm 2026, inh truh tơ̆ ou vă tơmang lăng. Inh kŭm hơpơi 'meh, lơ̆m sơnăm ou, hăm tơdrong hơgrop dôm dêh char, lêh akŏm pơkao dur yuăn gô răk 'măn lơ tơdrong 'lơ̆ng hơ-iă ăn tơmoi truh tơmang pơhiơ̆ tơ̆ Gia Lai.”

Lơ̆m chăl sơnăm kơmăi kơmŏk kơsô̆, rim 'nu tơmoi oei gơh jing minh bơngai chă tơroi tơbăt gah hơnih truh tơmang. Đei um rup 'lơ̆ng, đei video chih răk đơ̆ng rŏng kơ 'măng chă tơmang gô pơm ăn um rup Gia Lai truh hăm lơ bơngai hloh. Buăl Đức, minh tiktoker truh đơ̆ng Đức Cơ tơroi: “ 'Năr ou inh năm truh tơ̆ ou pơm tơdrong tơroi tơbăt lơ̆m kơmăi kơsô̆, vă hơlen băt păng vă pơchơt hăm lêh akŏm. Inh ƀôh rim bơngai hiôk chơt dêh, atŭm chă check-in, phĭn rup tơ̆ dôm hơnih 'lơ̆ng rŏ vă hơtŏk lơ̆m mạng tơpôl, vă kơ bôl buăl lơ̆m păng 'nguaih kơ teh đak băt truh cham char plenh teh 'lơ̆ng rŏ tơ̆ Gia Lai. Inh hơpơi 'meh yua kơmăi phĭn rup ou vă rim bơngai băt hơdah, Gia Lai 'lơ̆ng rŏ dêh”.

Đơ̆ng Festival chĭng chêng truh Giĕng lêh akŏm pơkao dur yuăn  – Kông unh Chư Đang Ya, Gia Lai tŏk bŏk gơh chă tơroi kơ tơring po kơdih hăm dôm tơdrong kăp gĭt phara kơdih. Păng rim bơngai truh tơ̆ ou, rim um rup đei răk vei, rim tơdrong tơroi đei pơlan să adoi jing trong vă hơnhăk tơdrong 'lơ̆ng rŏ kơ tơring teh ou truh tơjê̆ hloh hăm tơmoi tơ̆ rim tơring.