Tơ̆ plei Kram, xăh Ea Ktur, dêh char Đắk Lắk, kâu lak ƀô̆ tôn chĭng chêng hlôi pơjing đơ̆ng lơ sơnăm kơ âu. Đơ̆ng rŏng kơ tơmơ̆t hơdai pơlei lơ̆m khei 6 âu ki, kơsô̆ bơngai jang lơ̆m kâu lak ƀô̆ roi tŏk, tơdrong jang hơnơ̆ng đei pơvei. ‘Nhŏng Y Yôp Knul, bơngai jang lơ̆m kâu lak ƀô̆ tơroi, ‘ngoăih kơ chĭng Ê Đê rim kơloăi, đe buăl mơlôh oei tôn chĭng arap kơ bơngai Ja Rai, Chĭng klơk, klel păng lơ tơmam tôn reh joăt joe nai hai.

“Tơmam tôn reh ‘noh ling lang đei tơ̆ lơ̆m pơlei, tơdrong pơhrăm ‘noh năr hơyơ kŭm pơhrăm. Tơ̆ nhôn ‘noh tŏk bŏk đei kâu lak ƀô̆ tôn chĭng tơ̆ lơ̆m pơlei pơla, sơ̆ ‘noh lăp 1 pơlei đĕch, kơsô̆ đĭ hloh 30 ‘nu, đơ̆ng rŏng kơ tơmơ̆t hơdai ‘noh kơsô̆ hloh 2 ‘măng, roi lơ hloh dơ̆ng, pơđĭ hloi tơmam tôn reh păng hơsoang, pơma atŭm ‘noh đĭ đăng dôm lêh dăh mă dôm ƀai bơngai kon kông năm tôn, hơri, hơsoang ‘noh đei adoi vang akŏm ngăl”.

Tơ̆ păih hơlĕch dêh char Đắk Lắk, hơdrol kơ tơmơ̆t hơdai, dêh char Phú Yên đei hloh 20 kâu lak ƀô̆ tuồng, hơri chòi păng hơri tài tử. Dôm tơdrong joh ayŏ joăt joe kŭm đei dôm khŭl, grŭo tơmơ̆t lơ̆m tơdrong pơlong vă sơng đei hơdruh tơdăm.

Đơ̆ng rŏng kơ tơmơ̆t hơdai păng proh hơmet anih bơ̆jang, tơdrong ‘lơ̆ng hơiă joh ayŏ hơdrô̆ tơring đak dơsĭ đei đoàn viên hơdruh tơdăm lăng kăl pơhrăm păng hơri hơsoang, mă loi ‘noh jĭ lơ̆m dôm tơdrong jang pơlong kơ dêh char.

‘Nhŏng Phạm Ngọc Toàn, Bí thư Đoàn xăh Tuy An Tây, dêh char Đắk Lắk tơbăt, dôm Khŭl, Grŭp tơ̆ tơring hơnơ̆ng pơvei dôm tơdrong pơlong hơri kră sơ̆, hơdai hăm dôm tơdrong jang roi tơbăt ƀai hơri kach mang, pơm dơ̆ng tơdrong hiôk vă hơdruh tơdăm tơchă hơlen băt joh ayŏ joăt joe.

“Lơ̆m khei ‘năr tơ jê̆ âu ‘noh dôm tơdrong pơlong đei rim kơdră khŭl pơgơ̆r hơnơ̆ng, lơ̆m noh ‘noh ‘ngoăih kơ roi tơbăt dôm ƀai hơri kach mang ‘noh dôm ‘măng pơlong găh hơri kră sơ̆ kŭm đei dôm khŭl, grŭp tơ̆ tơring pơgơ̆r hơnơ̆ng păng kiơ̆ đơ̆ng noh vă kơ đe buăl chĕp vei đei dôm tơdrong ‘lơ̆ng hơiă joh ayŏ kơdŏ soang kơ bơngai Việt Nam”

Tơdrong jang hơdruh tơdăm hơri brông, tôn reh tơmam tôn reh kon kông hlôi đei pơvei lơ sơnăm âu ki tơ̆ Đắk Lắk. Hơdrô̆ sơnăm 2024, pơlong tơ̆ dêh char sơng đei vă jê̆ 200 ‘nu bơngai ưh kơ joăt joh hơri ‘noh jĭ dôm đoàn viên hơdruh tơdăm truh đơ̆ng 13 anih jang kơ apŭng, hăm 26 ƀai. Sơnăm 2025, yua đơ̆ng bơ̆jang kiơ̆ proh hơmet, tơmơ̆t hơdai anih bơ̆jang, tơdrong jang pơlong ưh kơ đei pơgơ̆r.

Truh khei 10 sơnăm ‘nâu, lơ̆m jơ năr dôm tơdrong jang tơbăt 70 sơnăm Năr joăt joe Khŭl hơdruh tơdăm Việt Nam, Anih jang đoàn dêh char Đắk Lắk pơgơ̆r pơlong, pơm ‘măng vă hơdruh tơdăm rim tơring tơƀơ̆p, roi tơƀôh joh ayŏ kơdŏ soang joăt joe.

‘Nhŏng Y Lê Pas Tơr, Phŏ Bí thư anih jang đoàn dêh char Đắk Lắk akhan, tơdrong pơgơ̆r dơ̆ng pơlong đơ̆ng rŏng tơmơ̆t hơdai dêh char hơnơ̆ng pơm tơdrong hiôk vă kơ rim kâu lak ƀô̆, khŭl grŭo joh ayŏ kơdŏ soang hơdruh tơdăm tơƀơ̆p, hŏk pơhrăm păng roi tơƀôh dôm tơdrong hơiă hơdrô̆ kơ tơring kơdih. ‘Nâu kŭm jing 1 lơ̆m dôm tơdrong jang đei Anih jang đoàn dêh char Đắk Lắk pơvei vă pơtrŭt bơngai mơlôh vang chĕp vei joh ayŏ kơdŏ soang joăt joe.

“Nhôn hơmĕng ‘noh jĭ gô đei lơ tơdrong ‘lơ̆ng hloh dơ̆ng, kŭm nhen pơm cham pơchơt, hơnih pơngôi vă kơ đe buăl, dôm kâu lak ƀô̆ tơƀôh tơdrong gơh băt joh ayŏ kơdŏ soang kŭm nhen tơdrong gơh hơgei đơ̆ng kơdih. Hơdai hăm ‘noh roi tơƀôh đei tơdrong ‘lơ̆ng hơiă joh ayŏ kơdŏ soang joăt joe gĭt kăl kơ hơdrĕch hơdrŭng bơ̆n truh hăm lơ lap bôl buăl lơ̆m dêh char”.

Ưh khan lăp đei dơ̆ng ‘măng tơƀơ̆p, kiơ̆ rim ‘măng pơhrăm, tôn reh, hơri hơsoang, dôm bơngai mơlôh tơ̆ Đắk Lắk kŭm đei dơ̆ng tơdrong hiôk băt păng tơklep hăm joh ayŏ kơdŏ soang kơ hơdrĕch hơdrŭng kơdih. Tơdrong vang akŏm đơ̆ng hơdruh tơdăm lơ̆m dôm kâu lak ƀô̆, khŭl joh hơri hơsoang tơ̆ tơring gô tơgop pơvei dôm boa hơri brông, jơva chĭng păng tơmam tôn reh joăt joe lơ̆m tơdrong hơrih sa tơpôl.